പാലക്കാട്: ധോണിയിലെ 'നിര്‍ഭയ' എന്ന കേന്ദ്രത്തില്‍ കാണാതായ ഇരുപത്തിയൊന്നുകാരിയെ പീഡിപ്പിച്ച തിരുവനന്തപുരത്തുകാരനായ ഓട്ടോ ഡ്രൈവറെ ഹേമാംബിക നഗര്‍ പൊലിസ് അറസ്റ്റുചെയ്തു. തിരുവനന്തപുരം കുണ്ടല സിയോണ്‍ മന്ദിരത്തിലെ ജോണ്‍വല്‍സന്റെ മകന്‍ സാം ജെ. വല്‍സണ്‍(36)ആണ് പിടിയിലായത്.
ഇന്നലെ പീഡനത്തിനിരയായ പെണ്‍കുട്ടിയുമായി തിരുവനന്തപുരത്തു ചെന്ന് പ്രതിയെ നേരില്‍ കസ്റ്റഡിയിലെടുക്കുകയായിരുന്നു. സംഭവത്തെക്കുറിച്ച് പൊലിസ് പറയുന്നതിങ്ങനെ. ധോണിയിലെ നിര്‍ഭയ എന്ന കേന്ദ്രം ബന്ധുജനങ്ങളൊന്നുമില്ലാത്തവരെ പാര്‍പ്പിക്കാന്‍ വേണ്ടിയുളളതാണ്. ഇവിടുത്തെ അന്തേവാസിയാണ് തിരുവനന്തപുരം ഏഴുമുറി സ്വദേശിനിയായ ഇരുപത്തിയൊന്നുകാരി. കഴിഞ്ഞ 14ന് ഈ പെണ്‍കുട്ടിയെ കാണാതായി. ഇതുമായി ബന്ധപ്പെട്ട് അന്നുതന്നെ നിര്‍ഭയ കേന്ദ്രത്തിന്റെ അധികാരികള്‍ ഹേമാംബികനഗര്‍ പൊലിസില്‍ പരാതി നല്‍കി. ഇതെതുടര്‍ന്ന് അന്വേഷണം നടത്തി വരവെ കഴിഞ്ഞ ദിവസം പെണ്‍കുട്ടി നിര്‍ഭയയില്‍ തിരച്ചെത്തി. പിന്നീടാണ് പീഡനം വിവരം പറയുന്നത്.
നിര്‍ഭയയില്‍ നിന്നും പോയ പെണ്‍കുട്ടി നേരെ എത്തിയത് തിരുവനന്തപുരത്താണ്. ഇവിടെ നേമം സബ് രജിസ്ട്രാര്‍ ഓഫിസിനു സമീപത്തു നിന്നും പീഡനക്കേസിലെ പ്രതിയായ സാം ജെ. വല്‍സണിന്റെ ഓട്ടോയില്‍ കയറി. ഓട്ടോയില്‍ കയറ്റിക്കൊണ്ടുപോയ പ്രതി പിന്നീട് പെണ്‍കുട്ടിയെ പീഡിപ്പിക്കുകയായിരുന്നു.
പാലക്കാട് കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് റിമാന്റു ചെയ്തു.