കയ്പമംഗലം: ജില്ലാ പഞ്ചായത്ത് കയ്പമംഗലം ഡിവിഷനിലേക്ക് ഇന്ന് നടക്കുന്ന ഉപതെരഞ്ഞെടുപ്പിന് ഒരുക്കങ്ങള്‍ പൂര്‍ത്തിയായി. രാവിലെ മതിലകം സെന്റ് ജോസഫ് ഹൈസ്‌കൂളില്‍ നിന്നും പോളിംഗ് ബൂത്തിലേക്കുള്ള വോട്ടിംഗ് സാമഗ്രികളുടെ വിതരണം നടന്നു. സുരക്ഷാ ക്രമീകരണങ്ങള്‍ക്കായി മുന്നൂറോളം പൊലിസുകാരെയും വിന്യസിച്ചിട്ടുണ്ട്. ക്രമസമാധാനത്തിന്റെ ഭാഗമായി പ്രശ്‌ന ബാധിത പ്രദേശമായ പെരിഞ്ഞനം സ്മാരകം സ്‌കൂള്‍ പരിസരത്ത് എ.എസ്.പി മെറിന്‍ ജോസഫിന്റെ നേതൃത്വത്തില്‍ പൊലിസ് സംഘം റൂട്ട് മാര്‍ച്ച് നടത്തി. എടവിലങ്ങ് ഗ്രാമപഞ്ചായത്തിലെ രണ്ടു വാര്‍ഡുകളും ശ്രീനാരായണപുരം പഞ്ചായത്തിലെ 6 വാര്‍ഡുകളും മതിലകം പഞ്ചായത്തിലെ 15 വാര്‍ഡുകളും പെരിഞ്ഞനം പഞ്ചായത്തിലെ 15 വാര്‍ഡുകളും കയ്പമംഗലം പഞ്ചായത്തിലെ 17 വാര്‍ഡുകളും എടത്തിരുത്തിയിലെ 4 വാര്‍ഡുകളും ഉള്‍പ്പെടെ 59 ഗ്രാപഞ്ചായത്ത് വാര്‍ഡുകളുള്‍പ്പെടുന്നതാണ് കയ്പമംഗലം ഡിവിഷന്‍.115 ബൂത്തുകളിലായാണ് വോട്ടിംഗ് നടക്കുന്നത്. രാവിലെ 7 മുതല്‍ വൈകീട്ട് 5 വരെയാണ് വോട്ടിംഗ് നടക്കുക. നാളെ രാവിലെ 10 മണിക്ക് മതിലകം സെന്റ് ജോസഫ് ഹൈസ്‌കൂളില്‍ വോട്ടെണ്ണല്‍ ആരംഭിക്കും. എല്‍.ഡി.എഫ്.സ്ഥാനാര്‍ഥിയായി എ.ഐ.എസ്.എഫ് ജില്ലാ പ്രസിഡന്റ് ബി.ജി വിഷ്ണുവും യു.ഡി.എഫ് സ്വതന്ത്ര സ്ഥാനാര്‍ഥിയായി അഡ്വ: ഒ.എസ്‌നഫീസയും എന്‍.ഡി.എ സ്ഥാനാര്‍ഥിയായി കെ.ബി അജയ്‌ഘോഷും വെല്‍ഫെയര്‍ പാര്‍ട്ടി സ്ഥാനാര്‍ഥിയായി പൊന്നാത്ത് റഷീദും പി.ഡി.പി സ്ഥാനാര്‍ഥിയായി കെ.കെ അബ്ബാസുമാണ് മത്സര രംഗത്തുള്ളത്. ജില്ലാ പഞ്ചായത്തംഗമായിരുന്ന ഇ.ടി ടൈസണ്‍ മാസ്റ്റര്‍ നിയമസഭാംഗമായതിനെ തുടര്‍ന്നുണ്ടായ ഒഴിവിലേക്കാണ് തെരഞ്ഞെടുപ്പ് നടക്കുന്നത്.