മൂന്നാര്‍: സ്വകാര്യ ബസ്സും ഇന്റിഗോ കാറും കൂട്ടിയിടിച്ചു രണ്ടര വയസുകാരന് ഗുരുതരമായി പരുക്കേറ്റു.
കണ്ണന്‍ദേവന്‍ കമ്പനി ദേവികുളം എസ്റ്റേറ്റ് ഒ.ഡി.കെ ഡിവിഷന്‍ സ്വദേശി ആന്റണി മണിമേഖല ദമ്പതികളുടെ മകന്‍ റിത്തിക്ക് (രണ്ടര)നാണ് പരുക്കേറ്റത്. ഇന്നലെ ഉച്ചതിരിഞ്ഞ് രണ്ടു മണിയോടെ കൊച്ചി-മധുര ദേശീയ പാതയില്‍ ലാക്കാട് ഫാക്ടറി പാലത്തിന് സമീപത്തെ വളവിലാണ് അപകടം.
അമ്മയും രണ്ടരവയസുകാരനുമായി കാറില്‍ വീട്ടിലേയ്ക്ക് മടങ്ങുന്നതിനിടെ നിയന്ത്രണം വിട്ട് എതിരെ വന്ന കുമളി-മൂന്നാര്‍ സ്വകാര്യ ബസ്സുമായി കൂട്ടിയിടിക്കുകയായിരുന്നു. അപകടത്തില്‍ പരുക്കേറ്റ കുട്ടിയെയും ആന്റണിയുടെ അമ്മ റോസ് മേരിയെയും മൂന്നാര്‍ ടാറ്റക്ടീ ജനറല്‍ ആശുപത്രിയിലെത്തിച്ചു. ഗുരുതരമായി പരുക്കേറ്റ കുട്ടിയെ വിദഗ്ദ ചികിത്സയ്ക്കായി കോലഞ്ചേരിയിലേയ്ക്ക് മാറ്റി. അപകടത്തില്‍ ഇന്റിഗോ കാര്‍ പൂര്‍ണമായി തകര്‍ന്നു.