ഈരാറ്റുപേട്ട: മീനച്ചിലാറിന്റെ കൈവഴിയായ തീക്കൊയി ആറ്റില്‍ ചേരിപ്പാട് ഭാഗത്ത് നടപ്പാക്കാന്‍ ഉദ്ദേശിച്ചിരുന്ന ചേരിപ്പാട് അണക്കെട്ട് പദ്ധതി പുനരാരംഭക്കണമെന്ന് ആവശ്യം.
ഈരാറ്റുപേട്ട തലപ്പുലം മേഖലയില്‍ വേനല്‍ക്കാലത്ത് ഉണ്ടാകുന്ന ജലക്ഷാമം പരിഗണിച്ച് ഈ അണക്കെട്ട് എന്തു കൊണ്ടും ജനങ്ങള്‍ക്ക് വളരെ പ്രയോജനകരമാണ്. ജനവാസം തീരെ കുറഞ്ഞ തീക്കോയി തലപ്പുലം പഞ്ചായത്തുകളുടെ ആറ്റു തീരത്തു മാത്രമെ വെള്ളം കയറുകയുള്ളൂ എന്നാണ് ചൂണ്ടിക്കാണിക്കുന്നത്.
1981-ല്‍ കരുണാകര സര്‍ക്കാരിന്റെ കാലത്താണ് പദ്ധതിക്കുവേണ്ടി സര്‍വേ നടത്തിയത്. അന്ന് ആറ്റില്‍ ചേരിപ്പാറ ഭാഗത്ത് പാറയുടെ ബലം പരിശോധിക്കുന്നതിന് ബോറിംഗ് ഉള്‍പ്പടെ പണികള്‍ നടന്നിരുന്നു. ഗ്രാമം വെള്ളത്തിലാകുമെന്ന പരാതിയെ തുടര്‍ന്ന് പദ്ധതി അടുക്കത്തേക്ക് മാറ്റിയങ്കിലും അവിടെയും പദ്ധതി നടന്നില്ല. അന്ന് ഉയരമുള്ള അണകെട്ട് പദ്ധതിക്കാണ് ആലോചന ഇട്ടത്.
എന്നാല്‍ ഇരുവശവും പാറ ഉയര്‍ന്നു നില്‍ക്കുന്ന ഇവിടെ ഉയരം കുറഞ്ഞ മിനിഡാം നിര്‍മിക്കണമെന്നാണ് ജനങ്ങളുടെ ആവശ്യം. നഗരവുമായി വളരെ അകന്നു നില്‍ക്കുന്ന പ്രദേശമായതിനാല്‍ ഇവിടെ വെള്ളത്തില്‍ മാലിന്യം കലരാനുള്ള സാധ്യതയില്ല. അതു കൊണ്ടു തന്നെ കുടിവെള്ള വിതരണത്തിന് ഉപകരിക്കുമെന്നാണ് ചൂണ്ടിക്കാണിക്കുന്നത്.