കോട്ടയം: കാര്‍ നിയന്ത്രണം വിട്ടു വീട്ടിലേക്കു ഇടിച്ചുകയറി മൂന്നു പേര്‍ക്ക് പരുക്ക്. വീട്ടുകാര്‍ പരുക്കേല്‍ക്കാതെ അത്ഭുതകരമായി രക്ഷപ്പെട്ടു.
ഇന്നലെ, രാവിലെ പത്തരയോടെ മണര്‍കാട് - ഏറ്റുമാനൂര്‍ ബൈപാസ് റോഡില്‍ പൂവത്തുംമൂടിനു സമീപമായിരുന്നു അപകടം. പനച്ചിക്കാട് പാവക്കുളത്ത് ഡിബു ജോസ്, ഡെല്‍വി, ജിനോ എന്നിവര്‍ക്കാണു പരുക്കേറ്റത്. വാഹനം ഓടിച്ച പാവക്കുളത്ത് ഡിനോ ജോസ്, ജിനോ എന്നിവര്‍ പരുക്കേല്‍ക്കാതെ രക്ഷപ്പെട്ടു. വിദേശത്തു നിന്നെത്തിയ യുവാവിനെ സ്വീകരിച്ചു കൊണ്ടുപോകുന്നതിനിടെയായിരുന്നു അപകടം.
പരുക്കേറ്റവരില്‍ ഒരാള്‍ കോട്ടയം മെഡിക്കല്‍ കോളജ് ആശുപത്രിയിലും മറ്റുള്ളവര്‍ തെള്ളകത്തെ സ്വകാര്യ ആശുപത്രിയിലും ചികിത്സയിലാണ്. ഖത്തറില്‍ ജോലി ചെയ്യുന്ന ഡിബുവിനെ നെടുമ്പാശേരിയില്‍ നിന്നു വീട്ടിലേക്കു കൊണ്ടുവരുന്നതിനിടെയാണ് അപകടം. പൂവത്തുംമൂട് പാലം കഴിഞ്ഞപ്പോള്‍ കാര്‍ നിയന്ത്രണം വിട്ട് വഴിയരുകിലെ ഓടയില്‍ ചാടി ഇലക്ട്രിക് പോസ്റ്റും തകര്‍ത്ത് കിഴക്കേടത്തു മാനുവല്‍ മാണിയുടെ വീട്ടിലേക്ക് ഇടിച്ചു കയറുകയായിരുന്നു.
വീടിന്റെ ഒരു ഭാഗത്തിനു നേരിയ തകര്‍ച്ചയുണ്ടായെങ്കിലും വീട്ടിലുണ്ടായിരുന്ന ആര്‍ക്കും പരുക്കില്ല. വാഹനത്തില്‍ അഞ്ചു പേരാണുണ്ടായിരുന്നത്. അപകടത്തില്‍ കാര്‍ പൂര്‍ണമായി തകര്‍ന്നു. അയര്‍ക്കുന്നം പൊലിസ് മേല്‍നടപടികള്‍ സ്വീകരിച്ചു.