ചങ്ങരംകുളം: 201 പേരുടെ പഞ്ചവാദ്യവും 101 പേരുടെ തായമ്പകയും നടത്തി ലിംക ബുക്ക് റെക്കോര്‍ഡ് കരസ്ഥമാക്കിയ വളയംകുളം സോപാനം സ്‌കൂള്‍ ഓഫ് പഞ്ചവാദ്യത്തില്‍ വാദ്യ കലയെക്കുറിച്ച് പഠിക്കാന്‍ യു.കെയില്‍നിന്നു വിദേശികളെത്തി. യു.കെയിലെ ബര്‍മിങ്ഹാമില്‍നിന്നു കേരളത്തിലെ വാദ്യകലകളെക്കുറിച്ച് പഠിക്കാനെത്തിയ ഡേവ് സ്റ്റീവെര്‍റ്റ്‌സും കാതെ മൈക്കിളുമാണ് വളയംകുളം സോപാനം സ്‌കൂളിലെത്തിയത്.
സംഘം ബര്‍മിങ്ഹാം യൂനിവേഴ്‌സിറ്റി ആര്‍ക്കിയോളജി ഡിപ്പാര്‍ട്‌മെന്റില്‍നിന്നു വിരമിച്ചവരാണ്.
ബ്ലുയൊണ്ടെര്‍ റെസ്‌പോണ്‍സിബിള്‍ ടൂറിസം വഴി പ്രകാശ് മഞ്ഞപ്ര യോടൊപ്പം സോപാനം സ്‌കൂള്‍ സന്ദര്‍ശിക്കുകയും കേരളത്തിന്റെ തനതായ വാദ്യകലകളെക്കുറിച്ചും ഉപകരണങ്ങളെക്കുറിച്ചും സോപാനം ഡയറക്ടര്‍ ആലംകോട് സന്തോഷ് ആശാന്‍ വിശദമായ ഡെമോണ്‍സ്‌ട്രേഷന്‍ നടത്തുകയും ചെയ്തു.