തിരൂരങ്ങാടി: കോളജ് യൂനിയന്‍ തെരഞ്ഞെടുപ്പിനെ തുടര്‍ന്ന് എസ്.ഡി.പി.ഐ, എം. എസ്.എഫ് സംഘര്‍ഷം. അഞ്ചുപേര്‍ക്കു പരുക്ക്. കോളജ് യൂനിയന്‍ തെരഞ്ഞെടുപ്പില്‍ വിജയിച്ച ചെയര്‍മാന്‍ സി.പി വാഹിദ് (19), ജനറല്‍ സെക്രട്ടറി പി.മുഹമ്മദ് അനസ് (19), ഫൈന്‍ ആര്‍ട്‌സ് സെക്രട്ടറി ഷബീബ് മലൂഫ് (19), എം.എസ്.എഫ് പ്രവര്‍ത്തകന്‍ ഇര്‍ഫാന്‍ അഹമ്മദ് (18), മുസ്‌ലിംലീഗ് പ്രവര്‍ത്തകന്‍ തിരൂരങ്ങാടി പാറക്കല്‍ റഫീഖ് (42) എന്നിവര്‍ക്കാണു പരുക്കേറ്റത്.
ഇവരെ തിരൂരങ്ങാടി താലൂക്കാശുപത്രിയില്‍ പ്രവേശിപ്പിച്ചു. ഇന്നലെ വൈകുന്നേരം തിരൂരങ്ങാടി പി.എസ്.എം ഒ കോളജിന് മുന്‍വശത്താണു സംഭവം. എസ്.ഡി.പി.ഐയുടെ പതാക കാണാതായതാണു സംഭവത്തിന് തുടക്കം. പതാക കാമ്പസ് ഫ്രണ്ട് പ്രവര്‍ത്തകര്‍ അഴിച്ചുകൊണ്ടുപോകുകയായിരുന്നുവെന്ന് വിദ്യാര്‍ഥികള്‍ പറഞ്ഞു. എന്നാല്‍ ആഹ്ലാദപ്രകടനം നടത്തുന്നതിനിടെ എം.എസ്.എഫ് പ്രവര്‍ത്തകര്‍ക്കുനേരെ പുറമെ നിന്നെത്തിയ എസ്.ഡി.പി.ഐ പ്രവര്‍ത്തകര്‍ ആക്രമണം അഴിച്ചുവിടുകയായിരുന്നു എന്ന് ദൃക്‌സാക്ഷികള്‍ പറഞ്ഞു. ആക്രമണം തടയാനെത്തിയ പാറക്കല്‍ റഫീഖിനു കല്ലു കൊണ്ടുള്ള ഇടിയേറ്റ് നെറ്റിയില്‍ സാരമായി പരുക്കേറ്റിട്ടുണ്ട്.
ആക്രമണത്തിനു ശേഷം തൊട്ടടുത്തുള്ള എസ്.ഡി.പി.ഐ ഓഫിസില്‍ കയറി ഒളിച്ച അക്രമികളെ പൊലിസ് സ്ഥലത്തെത്തി കസ്റ്റഡിയിലെടുക്കുകയായിരുന്നു.
എസ്.ഡി.പി.ഐ ഓഫിസില്‍ ആയുധങ്ങള്‍ സൂക്ഷിച്ചിട്ടുണ്ടെന്ന അഭ്യൂഹത്തെത്തുടര്‍ന്നു പൊലിസ് പരിശോധന നടത്തിയെങ്കിലും ഒന്നും കണ്ടെത്താനായില്ല. സംഭവത്തില്‍ ആറ് എസ്.ഡി.പി.ഐ പ്രവര്‍ത്തകരെ പൊലിസ് കസ്റ്റഡിയിലെടുത്തു.