എരുമേലി: ശബരിമല തീര്‍ഥാടനത്തിന് മുന്നോടിയായി എരുമേലിയിലും മറ്റ് അനുബന്ധ സ്ഥലങ്ങളിലും നടത്തിവരുന്ന ഒരുക്കങ്ങള്‍ അടിയന്തരമായി പൂര്‍ത്തിയാക്കണമെന്ന് ദേവസ്വംവൈദ്യുതി വകുപ്പ് മന്ത്രി കടകംപള്ളി സുരേന്ദ്രന്‍ വിവിധ വകുപ്പ് ഉദ്യോസ്ഥര്‍ക്ക് നിര്‍ദേശം നല്‍കി. എരുമേലി ദേവസ്വം ഹാളില്‍ നടന്ന അവലോകന യോഗത്തില്‍ അധ്യക്ഷനായിരുന്നു മന്ത്രി.  മുക്കൂട്ടുതറയില്‍ നിന്ന് എരുത്വാപുഴ കീരിത്തോട് വഴി പമ്പാവാലിയിലേയ്ക്കുളള റോഡ് സഞ്ചാരയോഗ്യമാക്കുന്നതിന്  പൊതുമരാത്ത് നിരത്ത് വിഭാഗത്തിന് അദ്ദേഹം നിര്‍ദേശം നല്‍കി.
 സുരക്ഷാ ക്രമീകരണങ്ങളുടെ ഭാഗമായി പോലിസ്, പഞ്ചായത്ത്, എക്‌സൈസ്, ആരോഗ്യം, റവന്യൂ, ഭക്ഷ്യസുരക്ഷാ ഉദ്യോഗസ്ഥരുടെ സംയുക്ത പരിശോധന ഊര്‍ജിതപ്പെടുത്തും. ചൂഷണം ഇല്ലാതാക്കുന്നതിന് ഓട്ടോ ടാക്‌സി നിരക്ക് നിശ്ചയിച്ച് പ്രസിദ്ധീകരിച്ചതായി റവന്യൂ ഡിവിഷണല്‍ ഓഫിസര്‍ യോഗത്തില്‍ അറിയിച്ചു. വിവിധ വകുപ്പകളുടെ പ്രവര്‍ത്തനം ഏകോപിപ്പിക്കുന്നതിന് എരുമേലി കേന്ദ്രമായി കണ്‍ട്രോള്‍ റൂം തുറക്കുന്നതിനുളള ജില്ലാ ഭരണകൂടത്തിന്റെ നടപടികളും  പൂര്‍ത്തിയായിട്ടുണ്ട്.  തീര്‍ഥാടനത്തിന് പ്ലാസ്റ്റിക് പൂര്‍ണമായും ഒഴിവാക്കി ശബരിമലയെ പ്ലാസ്റ്റിക് വിമുക്തമാക്കുന്നതിനുളള സര്‍ക്കാര്‍ ശ്രമങ്ങളോട് എല്ലാ തീര്‍ഥാടകരും സഹകരിക്കണമെന്നും മന്ത്രി അഭ്യര്‍ഥിച്ചു.   ഒരുക്കങ്ങളുടെ അന്തിമ വിലയിരുത്തല്‍ നടത്തുന്നതിന്  29 ന് ശബരിമലയില്‍ മുഖ്യമന്ത്രിയുടെ അധ്യക്ഷതയില്‍ പ്രത്യേക യോഗം ചേരും.