ലണ്ടന്‍: യുവേഫ യൂറോപ്പ ലീഗ് പോരാട്ടത്തില്‍ ഇംഗ്ലീഷ് കരുത്തരായ മാഞ്ചസ്റ്റര്‍ യുനൈറ്റഡിനു തകര്‍പ്പന്‍ ജയം. ഒന്നിനെതിരേ നാലു ഗോളുകള്‍ക്ക് അവര്‍ ഫെനര്‍ബാഷയെ കീഴടക്കി. സൂപ്പര്‍ താരം പോള്‍ പോഗ്ബയുടെ ഇരട്ട ഗോളുകളാണ് മാഞ്ചസ്റ്റര്‍ യുനൈറ്റഡിനു വിജയമൊരുക്കിയത്.
മറ്റു മത്സരങ്ങളില്‍ ഫെയനൂര്‍ദ് 1-0ത്തിനു സോറിയയേയും ഒളിംപ്യാകോസ് 4-1നു അസ്റ്റാനയേയും സെനിത് 2-1നു ഡന്‍ഡല്‍കിനേയും മക്കാബി ടെല്‍ അവിവ് അല്‍കമാറിനേയും ആസ്ട്ര വിക്‌ടോറിയ പ്ലാസനേയും 2-1നും സെയ്ന്റ് എറ്റിനെ 1-0ത്തിനു ക്വബാലയേയും പരാജയപ്പെടുത്തി. ഇറ്റാലിയന്‍ കരുത്തരായ റോമയെ 3-3നു ആസ്ട്രിയ വിയന്‍ സമനിലയില്‍ തളച്ചു. മെയിന്‍സിനെ ആന്‍ഡര്‍ലെറ്റും സസോളോയെ റാപിഡ് വിയനും 1-1നു സമനിലയില്‍ കുടുക്കി. അത്‌ലറ്റിക്ക് ബില്‍ബാവോയെ 0-2നു ജെംകും അപോയലിനെ 1-3നു യങ് ബോയ്‌സും അട്ടിമറിച്ചു.
കളിയുടെ 31ാം മിനുട്ടില്‍ പെനാല്‍റ്റിയിലൂടെയും 45ാം മിനുട്ടിലും ഗോളടിച്ചാണ് പോഗ്ബ തിളങ്ങിയത്.
34ാം മിനുട്ടില്‍ മാര്‍ഷ്യല്‍, 48ാം മിനുട്ടില്‍ ലിംഗാര്‍ഡ് എന്നിവരും മാഞ്ചസ്റ്ററിനായി വല ചലിപ്പിച്ചു. ഫെനര്‍ബാഷെയുടെ ആശ്വാസ ഗോള്‍ മുന്‍ മാഞ്ചസ്റ്റര്‍ യുനൈറ്റഡ് താരം റോബിന്‍ വാന്‍ പഴ്‌സി നേടി.