കോഴിക്കോട്: കേംബ്രിഡ്ജ് ഇന്റര്‍നാഷണല്‍ ബോര്‍ഡ് (സി.ഐ.ഇ) പത്താം ക്ലാസ് പരീക്ഷയില്‍ ഉന്നത വിജയം നേടി കോഴിക്കോട് സദ്ഭാവന വേള്‍ഡ് സ്‌കൂളിലെ മൂന്ന് വിദ്യാര്‍ഥികള്‍ ശ്രദ്ധേയരായി. സ്‌കൂളിലെ അഭയ് ജ്യോതിഷ് ഗോപിനാഥ്, അന്യ രാജ്കുമാര്‍,സാറ അഹമ്മദ് എന്നീ വിദ്യാര്‍ഥികളാണ് മിന്നുന്ന വിജയം സ്വന്തമാക്കിയത്.
 അഭയ് ജ്യോതിഷ് ഗോപിനാഥ് സയന്‍സ് വിഭാഗത്തിലെ ലോക റാങ്കില്‍ ഒന്നാമതെത്തി. ഇന്‍ഫര്‍മേഷന്‍ ആന്‍ഡ് കമ്യൂണിക്കേഷന്‍ ടെക്‌നോളജിയില്‍ ഇന്ത്യയിലെ ഒന്നാം റാങ്കും അഭയിനാണ്.
അന്യ രാജ്കുമാര്‍ ഇംഗ്ലീഷ് വിഭാഗത്തില്‍ അഞ്ചാം റാങ്കും ബിസിനസ് സ്റ്റഡീസില്‍ സാറ അഹമ്മദ് ഇന്ത്യയിലെ ഒന്നാം റാങ്കും നേടി. 140 രാജ്യങ്ങളില്‍ നിന്ന് വിവിധ സ്‌കൂളുകളില്‍ നിന്നായി നിരവധി  വിദ്യാര്‍ഥികള്‍ കേംബ്രിഡ്ജ് സിലബസില്‍ ഇന്റര്‍നാഷണല്‍ ബോര്‍ഡ് പരീക്ഷയില്‍ പങ്കെടുത്തിരുന്നു.
 സൗത്ത് ഇന്ത്യയിലെ ഒരു വിദ്യാര്‍ഥിക്ക് ആദ്യമായാണ് ഒന്നാം റാങ്ക് ലഭിക്കുന്നതെന്ന് സദ്ഭാവന വേള്‍ഡ് സ്‌കൂള്‍ പ്രിന്‍സിപ്പല്‍ ലളിതാ നായര്‍ വാര്‍ത്താ സമ്മേളനത്തില്‍ പറഞ്ഞു.
റാങ്ക് ജേതാക്കളായ അഭയ് ജ്യോതിഷ് ഗോപിനാഥ്, അന്യരാജ് കുമാര്‍, സാറ അഹമ്മദ്, സ്‌കൂള്‍ ട്രസ്റ്റി അഡ്വ. രഘുനാഥന്‍, സുഷമ നാലാപ്പാട്ട്, കെ. സബിത എന്നിവരും വാര്‍ത്താസമ്മേളനത്തില്‍ പങ്കെടുത്തു.