കുന്ദമംഗലം: എന്‍.ഐ.ടി കാലിക്കറ്റിന്റെ ടെക്‌നോ മാനേജ്‌മെന്റ് ഫെസ്റ്റ് 'തത്വ 16'ന്റെ ഒന്നാംദിനം ആവേശമായി. ദക്ഷിണേന്ത്യയിലെ ഏറ്റവും വലിയ ശാസ്ത്ര-സാങ്കേതിക മേളകളില്‍ ഒന്നായ 'തത്വ'യുടെ ആദ്യദിനത്തില്‍ ആയിരക്കണക്കിനു വിദ്യാര്‍ഥികളാണു വിവിധ മത്സരയിനങ്ങളില്‍ മാറ്റുരച്ചത്.
മുന്‍വര്‍ഷങ്ങളെ അപേക്ഷിച്ച് ഇത്തവണ കൂടുതല്‍പേര്‍ മത്സരത്തിനെത്തി. വാഹനപ്രേമികള്‍ക്കായി നടത്തുന്ന 'വീല്‍സ് ഓട്ടോഷോ' തിങ്ങിനിറഞ്ഞ കാണികള്‍ക്കു ഹരംപകര്‍ന്നു. ദൈവകണത്തിന്റെ കണ്ടെത്തലില്‍ പങ്കാളിയായ സേണിലെ ശാസ്ത്രജ്ഞ അര്‍ച്ചന ശര്‍മയുമായുള്ള സംവാദം വിദ്യാര്‍ഥികള്‍ക്ക് അറിവിന്റെ പുതുജാലകം തുറന്നുകൊടുത്തു. ഇ-മെയില്‍ കണ്ടുപിടിച്ച ഇന്ത്യന്‍ വംശജനായ അമേരിക്കന്‍ ശാസ്ത്രജ്ഞന്‍ ശിവ അയ്യാദുരയുടെ സാനിധ്യം 'തത്വ'യുടെ മാറ്റുകൂട്ടി.
എന്‍.ഐ.ടി സിവില്‍, മെക്കാനിക്കല്‍, ഇലക്ട്രിക്കല്‍, കംപ്യൂട്ടര്‍ സയന്‍സ്, ഇലക്ട്രോണിക്‌സ്, കെമിക്കല്‍ ഡിപ്പാര്‍ട്‌മെന്റുകള്‍ ഒരുക്കിയ പ്രദര്‍ശനശാലകള്‍, ആര്‍ക്കിടെക്ചര്‍ വിഭാഗത്തിന്റെ 'അഡിസ്യ ഫെസ്റ്റ് ', ബോളിവുഡ് ഗായകര്‍ നേതൃത്വം നല്‍കിയ 'പ്രോഷോനൈറ്റ് ' എന്നിവയും നടന്നു.
രണ്ടാംദിനമായ ഇന്ന് എന്‍ജിനീയറും എഴുത്തുകാരനുമായ ആദിത്യ അയ്യര്‍, യുവസംരംഭകന്‍ സാര്‍ഥക് സേഥി, പോഗോ ടി.വിയിലെ 'എഫ്.എ.ക്യു' പരിപാടിയിലൂടെ വിഖ്യാതനായ പ്രതീക്‌സേഥി എന്നിവരുടെ പ്രഭാഷണങ്ങളും അഡീസിയയുടെ ഭാഗമായി ഫോട്ടോഗ്രഫി, ആഭരണനിര്‍മാണം, മണ്‍പാത്ര നിര്‍മാണം എന്നീ ശില്‍പശാലകള്‍, ഡി.ജെ സയന കാതറിനും സംഘവും അവതരിപ്പിക്കുന്ന 'പ്രൊഷോ' എന്നിവ അരങ്ങേറും.