സുല്‍ത്താന്‍ ബത്തേരി: ടൗണില്‍നിന്ന് ഒഴുകിയെത്തുന്ന മാലിന്യത്തിന്റെ ദുരിതം പേറി കൈപ്പഞ്ചേരി നിവാസികള്‍. ആശുപത്രികളിലേതടക്കമുള്ള മാലിന്യമാണു ജനവാസകേന്ദ്രത്തിലൂടെയുള്ള കൈപ്പഞ്ചേരി തോട്ടിലൂടെ ഒഴുകുന്നത്.
ആശുപത്രികള്‍, ഹോട്ടലുകള്‍ തുടങ്ങി ടൗണിലെ സര്‍വമാലിന്യങ്ങളും ഒഴുകുന്നത് ഈ തോട്ടിലൂടെയാണ്. തോടിന്റെ ഇരുഭാഗങ്ങളിലും നൂറുകണക്കിനു കുടുംബങ്ങളാണു താമസിക്കുന്നത്. മാലിന്യങ്ങള്‍ തോട്ടിലൂടെ ഒഴുകുന്നതിനാല്‍ അസഹനീയമായ ദുര്‍ഗന്ധവും പ്രദേശത്തുകാരെ ദുരിതത്തിലാക്കുന്നുണ്ട്. ഇതിനുപുറമെ ആസ്തമ, ദേഹം ചൊറിച്ചില്‍ തുടങ്ങിയ രോഗങ്ങളും പ്രദേശവാസികള്‍ക്കുണ്ടാകുന്നു. തോട്ടിലൂടെയുള്ള മാലിന്യഒഴുക്കു തടയാന്‍ നടപടിവേണമെന്നാവശ്യപ്പെട്ടു നിരവധി പരാതികള്‍ പ്രദേശവാസികള്‍ അധികൃതര്‍ക്കു നല്‍കിയിട്ടും നടപടിയുണ്ടാകുന്നില്ലെന്നാണു നാട്ടുകാര്‍ പറയുന്നത്.