തൃക്കരിപ്പൂര്‍: ആയിറ്റി ഒന്നാം വാര്‍ഡിലേക്കു നടന്ന ഉപതെരഞ്ഞെടുപ്പില്‍ 66.33 ശതമാനം പോളിങ് രേഖപ്പെടുത്തി. ഭൂരി ഭാഗം വോട്ടര്‍മാരും ഉച്ചയോടെ തന്നെ വോട്ടുകള്‍ രേഖപ്പെടുത്തി. സംഘര്‍ഷ മേഖലയല്ലാതിരുന്നിട്ടും നീലേശ്വരം സി.ഐയുടെ നേതൃത്വത്തില്‍ വന്‍ പൊലിസ് സംഘത്തെ പോളിങ് സ്റ്റേഷനായ ആയിറ്റി ഇസ്‌ലാമിയ എ.എല്‍.പി സ്‌കൂളിലും പ്രധാന റോഡിലും വിന്യസിച്ചിരുന്നു. കഴിഞ്ഞ ത്രിതല തെരഞ്ഞെടുപ്പില്‍ ആയിറ്റി വാര്‍ഡില്‍ നിന്നു ജയിച്ച സ്വതന്ത്ര സ്ഥാനാര്‍ഥി വി അനീസയുടെ രാജിയെ തുടര്‍ന്നാണ് ആയിറ്റിയില്‍ ഉപതെരഞ്ഞെടുപ്പ് വേണ്ടി വന്നത്.
യു.ഡി.എഫിനു വേണ്ടി മുസ്‌ലിം ലീഗിലെ കെ.വി തഹ്‌സീറ, ഇടതു സ്വതന്ത്രയായി സി.പി.എമ്മിലെ വി.വി അജിത, ബി.ജെ.പിയിലെ എം ഷൈനി എന്നിവരാണ് മത്സര രംഗത്തുണ്ടായിരുന്നത്. കഴിഞ്ഞ തവണ സ്വതന്ത്ര സ്ഥാനാര്‍ഥിയായി മത്സരിച്ചു ജയിച്ച വി അനീസ 301 വോട്ടിന്റെ ഭൂരിപക്ഷത്തിനാണു തെരഞ്ഞെടുക്കപ്പെട്ടത്. ആകെ 1527 വോട്ടര്‍മാരില്‍ 1013 പേര്‍ വോട്ടുരേഖപ്പെടുത്തി.  
നിലവില്‍ യു.ഡി.എഫ് ഭരിക്കുന്ന തൃക്കരിപ്പൂര്‍ പഞ്ചായത്തില്‍ മുസ്‌ലിം ലീഗിലെ വി.പി ഫൗസിയയാണ് പ്രസിഡന്റ്. ആയിറ്റി വാര്‍ഡടക്കം ആകെ 21 വാര്‍ഡുകളുള്ള തൃക്കരിപ്പൂര്‍ പഞ്ചായത്തില്‍ നിലവില്‍ യു.ഡി.എഫിന് 15 അംഗങ്ങളും (ലീഗ് 09, കോണ്‍ഗ്രസ് 05, ജനതാദള്‍ യു 01), എല്‍.ഡി.എഫിന് അഞ്ചും(സി.പി.എം 05) അംഗങ്ങളാണുള്ളത്. ഉപതെരഞ്ഞെടുപ്പിലെ ജയപരാജയം പഞ്ചായത്ത് ഭരണത്തെ ബാധിക്കില്ല. ഇന്ന് രാവിലെ എട്ടിന് തൃക്കരിപ്പൂര്‍ ഗ്രാമപഞ്ചായത്ത് ഓഫിസില്‍ വോട്ടെണ്ണും. ഒരു മണിക്കൂറിനകം ഫലം അറിയാന്‍ കഴിയും.