കൊച്ചി: സംസ്ഥാനത്ത് നിലനില്‍ക്കുന്ന അഭിഭാഷക -മാധ്യമ പ്രശ്‌നം ഉടന്‍ പരിഹരിക്കപ്പെടുമെന്ന് പ്രത്യാശിക്കുന്നതായി സുപ്രിം കോടതി ജസ്റ്റിസ് കുര്യന്‍ ജോസഫ് പറഞ്ഞു. താന്‍ മാധ്യമ പ്രവര്‍ത്തകരെ 'സുഹൃത്തുക്കളെ'യെന്ന് അഭിസംബോധന നടത്തുന്നതും ഈ പ്രതീക്ഷയുടെ ഭാഗമാണ്. കൊച്ചിയില്‍ ലിസി ആശുപത്രിയുടെ അറുപതാം വാര്‍ഷികസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ഉദ്ഘാടന വാര്‍ത്ത റിപ്പോര്‍ട്ട് ചെയ്യാന്‍ എത്തിയ മാധ്യമപ്രവര്‍ത്തകരെ സുഹൃത്തുക്കളെയെന്ന് ജസ്റ്റിസ് സംബോധന ചെയ്തപ്പോള്‍ സദസില്‍നിന്നും ചിരി ഉയര്‍ന്നു. തന്നെപോലെ ഒരു ജസ്റ്റിസ് മാധ്യമപ്രവര്‍ത്തകരെ സുഹൃത്തുക്കളെയെന്ന് വിളിക്കുന്നതില്‍ സംശയിക്കേണ്ടെന്ന് അദ്ദേഹം പറഞ്ഞു. മാധ്യമ പ്രവര്‍ത്തകര്‍ അഭിഭാഷകര്‍ക്ക് സുഹൃത്തുക്കള്‍ തന്നെയാണ്. അതില്‍ മാറ്റമില്ല. അതുതന്നെയാണ് തന്റെ വിചാരമെന്നും അദ്ദേഹം പറഞ്ഞു.