ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ കരുത്തന്‍മാരായ ആഴ്‌സണലിനും ടോട്ടനം ഹോട്‌സ്പറിനും ഗോള്‍രഹിത സമനില. ആഴ്‌സണലിനെ മിഡ്ഡ്ല്‍സ്‌ബ്രോയും ടോട്ടനത്തെ ബേണ്‍മൗത്തുമാണ് ഗോളടിക്കാന്‍ അനുവദിക്കാതെ ഒപ്പം പിടിച്ചത്. നിലവിലെ ചാംപ്യന്‍മാരായ ലെയ്സ്റ്റര്‍ സിറ്റി, ക്രിസ്റ്റല്‍ പാലസിനെ 3-1നു കീഴടക്കി. മറ്റു മത്സരങ്ങളില്‍ വെസ്റ്റ് ഹാം യുനൈറ്റഡ് 1-0ത്തിനു സണ്ടര്‍ലാന്‍ഡിനെയും ബേണ്‍ലി 2-1 എവര്‍ട്ടനേയും സ്റ്റോക് സിറ്റി 2-0ത്തിനു ഹള്‍ സിറ്റിയേയും കീഴടക്കി. സ്വാന്‍സീ സിറ്റി- വാട്‌ഫോര്‍ഡ് മത്സരം ഗോള്‍രഹിത സമനില.
മാഡ്രിഡ്: വലന്‍സിയയുമായുള്ള പോരാട്ടത്തില്‍ ബാഴ്‌സലോണയ്ക്ക് 3-2ന്റെ ജയം. സമനിലയില്‍ അവസാനിക്കേണ്ടിയിരുന്ന മത്സരം കറ്റാലന്‍ പട രക്ഷിച്ചെടുക്കുകയായിരുന്നു. മെസ്സി ഇരട്ട ഗോളുകള്‍ നേടിയപ്പോള്‍ ഒരു ഗോള്‍ സുവാരസിന്റെ വകയായിരുന്നു. 22ാം മിനുട്ടില്‍ മെസ്സിയിലൂടെ ബാഴ്‌സ മുന്നില്‍ കടന്നപ്പോള്‍ 52, 56 മിനുട്ടുകള്‍ വല കുലുക്കി വലന്‍സിയ അവരെ ഞെട്ടിച്ചു.
62ാം മിനുട്ടില്‍ സുവരാസിലൂടെ ബാഴ്‌സ സമനില സ്വന്തമാക്കി. മത്സരം 2-2നു സമനിലയില്‍ അവസാനിക്കുമെന്നു പ്രതീക്ഷ ജനിച്ചെങ്കിലും അവസാന നിമിഷം ലഭിച്ച പെനാല്‍റ്റി വലയിലാക്കി മെസ്സി ജയം ഉറപ്പാക്കി. മറ്റു മത്സരങ്ങളില്‍ റയല്‍ ബെറ്റിസ് 2-1നു ഒസാസുനയെ പരാജയപ്പെടുത്തി. എസ്പാന്യോള്‍- എയ്ബര്‍ പോരാട്ടം 3-3നു സമനില.
 ജര്‍മന്‍ ബുണ്ടസ് ലീഗയില്‍ ബൊറൂസിയ ഡോര്‍ട്മുണ്ടിനെ ഇംഗോള്‍സ്റ്റഡ് 3-3നു സമനിലയില്‍ കുരുക്കി. മറ്റൊരു മത്സരത്തില്‍ വോള്‍വ്‌സ്ബര്‍ഗിനെ ഡാംസ്റ്റഡ് 3-1നു അട്ടിമറിച്ചു.
ഫ്രഞ്ച് ലീഗ് വണില്‍ മൊണാക്കോ 6-2നു മോണ്ട്‌പെല്ലിയറെയും ഒളിംപിക് ലിയോണിനെ ഗ്വിന്‍ഗാംപ് 3-1നും പരാജയപ്പെടുത്തി.