ജിദ്ദ: ഉംറ വിസക്കായി ഇ ട്രാക്ക് വഴിയുള്ള രജിസ്‌ട്രേഷന്‍ ആരംഭിച്ചതായി ഹജ്ജ് ഉംറ മന്ത്രാലയം അറിയിച്ചു. ഇതോടെ ഉംറ തീര്‍ഥാടകരുടെ വിവരങ്ങള്‍ ഉംറ സര്‍വിസ് കമ്പനികള്‍ക്ക് ഇ ട്രാക്ക് വഴി  രജിസ്റ്റര്‍ ചെയ്യാം.
വിവരങ്ങള്‍ മന്ത്രാലയം പുനപരിശോധിച്ച ശേഷം വിദേശങ്ങളിലെ സഊദി എംബസികളും കോണ്‍സുലേറ്റുകളും വഴി വിസ അനുവദിക്കുന്നതിനുള്ള വിവരങ്ങള്‍ വിദേശ മന്ത്രാലയത്തിന് അയച്ചു കൊടുക്കും. അടുത്തമാസം ആദ്യ മുതല്‍ ഉംറ തീര്‍ഥാടകര്‍ എത്തിത്തുടങ്ങും. ഈ വര്‍ഷം വിദേശങ്ങളില്‍ നിന്ന് 70 ലക്ഷത്തിലേറെ ഉംറ തീര്‍ഥാടകര്‍ എത്തുമെന്നാണ് കരുതുന്നതെന്നും മന്ത്രാലയ വൃത്തങ്ങള്‍ അറിയിച്ചു.
വിദേശങ്ങളിലെ ട്രാവല്‍ ഏജന്‍സികളും ഓപ്പറേറ്റര്‍മാരും വഴി ഉംറ പാക്കേജുകള്‍ വിപണനം നടത്താന്‍ തുടങ്ങിയതായി ഉംറ സര്‍വിസ് കമ്പനിയുടമകള്‍ അറിയിച്ചു. വിദേശ ഉംറ സേവനം നല്‍കുന്നതിന് 47 സര്‍വിസ് കമ്പനികള്‍ക്കാണ് ലൈസന്‍സുള്ളതെന്ന് ദേശീയ ഹജ് ഉംറ കമ്മിറ്റി പ്രസിഡന്റ് മര്‍വാന്‍ ശഅ്ബാന്‍ പറഞ്ഞു. ഉംറ സീസണുള്ള ഒരുക്കങ്ങള്‍ അവസാനഘട്ടത്തിലാണ്.
 വിശുദ്ധ ഹറമിനും മസ്ജിദുന്നബവിക്കും സമീപമുള്ള ഹോട്ടലുകളുമായും ബസ് സര്‍വിസ് കമ്പനികളുമായും നേരത്തെ തന്നെ ഉംറ സര്‍വിസ് കമ്പനികള്‍ കരാറുകള്‍ ഒപ്പുവെച്ചിട്ടുണ്ടെന്നും മര്‍വാന്‍ ശഅ്ബാന്‍ പറഞ്ഞു.