തിരൂര്‍: ക്ഷീരവികസന വകുപ്പിന്റെ ആഭിമുഖ്യത്തില്‍ പൂക്കയില്‍ തൂമരക്കാവ് എ.എല്‍.പി സ്‌കൂളില്‍ ക്ഷീരകര്‍ഷക സംഗമം സംഘടിപ്പിച്ചു. സംഗമത്തിന്റെ ഭാഗമായി കന്നുകാലി പ്രദര്‍ശനവും ക്ഷീര വികസന സെമിനാറും നടത്തി. ക്ഷീര വികസന വകുപ്പ്, ആത്മ മലപ്പുറം, തിരൂര്‍ ബ്ലോക്ക് പഞ്ചായത്ത്, നഗരസഭ, ക്ഷീരസഹകരണ സംഘങ്ങള്‍ എന്നിവയുടെ സഹകരണത്തോടെയായിരുന്നു പരിപാടി.
നഗരസഭാ ചെയര്‍മാന്‍ അഡ്വ. എസ്. ഗിരീഷ് ഉദ്ഘാടനം ചെയ്തു. വൈസ് ചെയര്‍പേഴ്‌സണ്‍ നാജിറ അഷ്‌റഫ് അധ്യക്ഷയായി. ക്ഷീര വികസന വകുപ്പ് ഡെപ്യൂട്ടി ഡയറക്ടര്‍ റാഫിപോല്‍ മുഖ്യപ്രഭാഷണം നടത്തി. മുതിര്‍ന്ന കര്‍ഷകരെ തിരൂര്‍ ബ്ലോക്ക് പഞ്ചായത്ത് പ്രസിഡന്റ് ആര്‍.കെ ഹഫ്‌സത്ത് ആദരിച്ചു.
കന്നുകാലി പ്രദര്‍ശനത്തില്‍ എറ്റവും നല്ല പശു, നല്ല കിടാരി, നല്ല കന്നുകുട്ടി എന്നിവയ്ക്ക് തിരൂര്‍ ബ്ലോക്ക് പഞ്ചായത്ത് വൈസ് പ്രസിഡന്റ് അഡ്വ. നസ്‌റുള്ള, കൗണ്‍സിലര്‍മാരായ മുഹമ്മദ് മൂപ്പന്‍, വി.കെ രുഗ്മിണി ടീച്ചര്‍, ഹഫ്‌സത്ത്, ബിജിത എന്നിവര്‍ സമ്മാനങ്ങള്‍ വിതരണം ചെയ്തു.