നിലമ്പൂര്‍: വിദ്യാര്‍ഥികള്‍ക്കു കഞ്ചാവ് നല്‍കുന്ന സംഘത്തിലെ രണ്ടുപേര്‍ എക്‌സൈസ് സംഘത്തിന്റെ പിടിയിലായി. കുറുമ്പലങ്ങോട് സ്വദേശി മുഹമ്മദ് റിസ്ഫാന്‍ (22), കുറുമ്പലങ്ങോട് കാവുംപുറം കുന്നുമ്മല്‍ വീട്ടില്‍ മുഹമ്മദ് ഷാഫി(40) എന്നിവരെയാണ് എക്‌സൈസ് പ്രിവന്റീവ് ഓഫിസര്‍ ടി.ഷിജുമോനും സംഘവും അറസ്റ്റ് ചെയ്തത്.
റിസ്ഫാനെ വടപുറം പാലത്തിനു സമീപം വെച്ച് ബൈക്കില്‍ കഞ്ചാവുമായി പോകുമ്പോഴാണു പിടികൂടിയത്. ഇയാളും കൂട്ടുകാരും കീര്‍ത്തിപ്പടിയില്‍ മുറിയെടുത്തിട്ടുണ്ടെന്ന് അന്വേഷണത്തിലറിഞ്ഞു. ഇവിടെയെത്തി അന്വേഷണം നടത്തുന്നതിനിടെയാണു കഞ്ചാവ് ഉപയോഗിക്കാനെത്തിയ 11 കുട്ടികള്‍ പിടിയിലാകുന്നത്. ഇവരെ പിന്നീട് രക്ഷിതാക്കള്‍ക്കൊപ്പം വിട്ടയച്ചു.
ഇവര്‍ക്ക് മുറിയെടുത്ത് നല്‍കിയത് കഴിഞ്ഞ 8 വര്‍ഷങ്ങളായി കഞ്ചാവ് വില്‍പന നടത്തുന്ന മുഹമ്മദ് ഷാഫിയാണെന്ന കുട്ടികളുടെ മൊഴിയെത്തുടര്‍ന്ന് ഇവരെക്കൊണ്ടു തന്നെ ഷാഫിയെ വിളിപ്പിച്ച് കഞ്ചാവിനാവശ്യപ്പെടുകയായിരുന്നു. കീര്‍ത്തിപ്പടിയില്‍ ഷാഫിയുടെ വാടക വീടിനു സമീപം കാത്തുനിന്ന എക്‌സൈസ് സംഘം ഇയാളെ ഓട്ടോയില്‍ കൊണ്ടുവന്ന 350 ഗ്രാം കഞ്ചാവടക്കം പിടികൂടുകയായിരുന്നു. കഞ്ചാവ് പാക്ക് ചെയ്യുന്നതിനുള്ള പോളിത്തീന്‍ കവറുകളും ഒരുക്കുന്നതിനുള്ള യന്ത്രവും ഇയാളില്‍ നിന്നും പിടികൂടി. തമിഴ്‌നാട്ടില്‍ നിന്നും കിലോ കണക്കിന് കഞ്ചാവുകള്‍ കൊണ്ടുവന്നു ചെറുപൊതികളാക്കിയാണു വിദ്യാര്‍ഥികള്‍ക്കു വില്‍പന നടത്തിയിരുന്നത്. ഇയാള്‍ക്കു കഞ്ചാവ് വില്‍പന നടത്തിയ മൊത്തവിതരണക്കാരനെ സംബന്ധിച്ചു വിവരം ലഭിച്ചതായി എക്‌സൈസ് അധികൃതര്‍ പറഞ്ഞു.
ഓട്ടോറിക്ഷയും ബൈക്കും കസ്റ്റഡിയിലെടുത്തു. എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ടി.അനില്‍ കുമാര്‍, പ്രിവന്റീവ് ഓഫിസര്‍മാരായ ടി.ഷിജുമോന്‍, കെ.രാമചന്ദ്രന്‍, സിവില്‍ എക്‌സൈസ് ഓഫിസര്‍മാരായ കെ.എ.അനീഷ്, സി.കെ.റംഷുദ്ദീന്‍ എന്നിവരടങ്ങുന്ന സംഘമാണ് അന്വേഷണം നടത്തി പ്രതികളെ അറസ്റ്റ് ചെയ്തത്. പ്രതികളെ മഞ്ചേരി ഫോറസ്റ്റ് കോടതി മുമ്പാകെ ഹാജരാക്കി റിമാന്‍ഡ് ചെയ്തു.