മേപ്പാടി: കാട്ടാന ഇറങ്ങുന്നതിനാല്‍ സൈ്വര്യജീവിതം നഷ്ടപ്പെട്ട് അരുണമല കോളനി. ഒറ്റയാനാണ് കോളനിയില്‍ ഭീതി പരത്തുന്നത്. കഴിഞ്ഞ ദിവസം രാത്രിയില്‍ ഇറങ്ങിയ കാട്ടാന വീട് തകര്‍ത്തു. കോളനിയിലെ വി ചന്ദ്രന്റെ വീടാണ് ആന തകര്‍ത്തത്. രാത്രി 12ഓടെ എത്തിയ ആന ആദ്യം ജനലുകള്‍ തകര്‍ത്തു. ശബ്ദം കേട്ട് വീട്ടുകാര്‍ കട്ടിലിനടിയില്‍ ഒളിച്ചിരിക്കുകയായിരുന്നു. അടുക്കള ഭാഗം ആനപൂര്‍ണമായും തകര്‍ത്തു.
വനാധിര്‍ത്തിയിലെ വൈദ്യുതി വേലി തകര്‍ത്താണ് ആന ജനവാസ കേന്ദ്രത്തിലെത്തിയത്. ഒരു മണിക്കൂറോളം വീടിന് ചുറ്റും ഭീകരാന്തരീക്ഷം സൃഷ്ടിച്ച ശേഷമാണ് ആന മടങ്ങിയത്. അരുണമല കോളനിയില്‍ കുറഞ്ഞ കുടുംബങ്ങളെ താമസമുള്ളൂ. ഈ ഭാഗത്ത് ആന സ്ഥിരമായി ഇറങ്ങാറുണ്ട്. വൈദ്യുതി വേലി നിര്‍മാണത്തിലെ അശാസ്ത്രീയതയാണ് ആന ഇറങ്ങാന്‍ കാരണം. കോളനിയിലെ ഏലം, കമുക് കുടുങ്ങിയ കാര്‍ഷിക വിളയും ആന നശിപ്പിച്ചിട്ടുണ്ട്.