കളമശ്ശേരി: കളമശ്ശേരി അപ്പോളോ ടയേഴ്‌സില്‍ നിന്ന് വലിയ രീതിയില്‍ പുക പടര്‍ന്നത് ജനങ്ങളില്‍ ആശങ്കയുണര്‍ത്തി. ശനിയാഴ്ച്ച വൈകീട്ട് ആറ് മണിയോടെയാണ് ഫാക്ടറിയുടെ മുന്‍വശത്ത് നിന്നും പുക പടര്‍ന്നത്.
കറുത്ത പുക പടര്‍ന്നത് കണ്ട് വ്യാപിരികളും ജനങ്ങളും ആശങ്കയിലായി. വലിയ പ്രദേശം മുഴുവന്‍ പുക വ്യാപിക്കുന്നതുകണ്ട് വ്യാപാരികള്‍ ഉടനെ പൊലിസിനെയും ഫയര്‍ ഫോഴ്‌സിനേയും വിളിച്ചെങ്കിലും വന്നില്ലെന്ന് ആക്ഷേപമുണ്ട്. പിന്നീട് ഏലൂരില്‍ നിന്നും ഫയര്‍ ഫോഴ്‌സ് എത്തിയെങ്കിലും ബോയിലര്‍ പൈപ്പ് മാറ്റിക്കൊടുത്തപ്പോള്‍ വന്നതാണിതെന്നും തങ്ങളുടെ ഉദ്യോഗസ്ഥരും ഫയര്‍ സംവിധാനവും ഉണ്ടെന്ന് ഫാക്ടറി അധികൃതര്‍ പറഞ്ഞതിനെത്തുര്‍ന്ന് തിരിച്ചുപോയി. എന്നാല്‍ ഉദ്യോഗസ്ഥര്‍ പറയുന്നത് ശരിയല്ലെന്നാണ് വ്യാപാരികള്‍ പറയുന്നത്.
ശ്രദ്ധിച്ചില്ലായിരുന്നെങ്കില്‍ അപകടം സംഭവിച്ചേനെയെന്നും വ്യാപാരികള്‍ പറഞ്ഞു. എന്നാല്‍ പൂര്‍ണ്ണ സുരക്ഷ പ്രദേശത്ത് ഉണ്ടയിരുന്നെന്ന് ഫാക്ടറി വൃത്തങ്ങള്‍ പറഞ്ഞു. എഞ്ചിനീയര്‍മാരും മറ്റും സ്ഥലത്തെത്തി ഉടനെ പ്രശ്‌നം പരിഹരിച്ചു.