ആലപ്പുഴ: പുന്നപ്ര രക്തസാക്ഷികള്‍ക്ക് ഇന്ന് ആയിരങ്ങള്‍ പ്രണാമം അര്‍പ്പിക്കും. വിവിധ വാര്‍ഡ് വാരാചരണ കമ്മിറ്റികളുടെ നേതൃത്വത്തില്‍ ഇന്ന് രാവിലെ ഇരുകമ്മ്യൂണിസ്റ്റ് പാര്‍ട്ടി നേതാക്കളും പ്രവര്‍ത്തകരും വര്‍ഗ്ഗ ബഹുജനസംഘടനാ പ്രവര്‍ത്തകരും ജാഥയായി രക്തസാക്ഷികള്‍ അന്ത്യവിശ്രമം കൊള്ളുന്ന പുന്നപ്രയിലെ സമരഭൂമിയില്‍ പുഷ്പാര്‍ച്ചന നടത്തും.
സമരസേനാനി വി എസ് അച്ചുതാനന്ദന്‍, ഭക്ഷ്യസിവില്‍സപ്ലൈസ് മന്ത്രി പി തിലോത്തമന്‍, പൊതുമരാമത്ത് മന്ത്രി ജി സുധാകരന്‍, സി പി ഐ സംസ്ഥാന എക്‌സിക്യൂട്ടീവ് അംഗം ടി പുരുഷോത്തമന്‍, ജില്ലാ സെക്രട്ടറി ടി ജെ ആഞ്ചലോസ്, സി പി ഐ എം ജില്ലാ സെക്രട്ടറി സജി ചെറിയാന്‍, വാരാചാരണ കമ്മിറ്റി പ്രസിഡന്റ് അഡ്വ. ജി കൃഷ്ണപ്രസാദ് തുടങ്ങിയവര്‍ പുഷ്പാര്‍ച്ചനയ്ക്ക് നേതൃത്വം നല്‍കും.
11.30ന് ചേരുന്ന രക്തസാക്ഷി അനുസ്മരണ സമ്മേളനത്തില്‍ വാരാചരണ കമ്മിറ്റി പ്രസിഡന്റ്അഡ്വ. ജി കൃഷ്ണപ്രസാദ് അധ്യക്ഷനാകും. സി പി എം ജില്ലാ സെക്രട്ടറി സജി ചെറിയാന്‍, സി പി ഐ ജില്ലാ സെക്രട്ടറി ടി ജെ ആഞ്ചലോസ് എന്നിവര്‍ അനുസ്മരണ പ്രഭാഷണങ്ങള്‍ നടത്തും. വി കെ ബൈജു സ്വാഗതം പറയും. വൈകിട്ട് മൂന്നിന് രക്തസാക്ഷി മണ്ഡപനടയില്‍ നിന്നും സമരസേനാനി പതിമൂന്നില്‍ വീട്ടില്‍ കുമാരന്‍, അന്തരിച്ച സമരസേനാനിയായ പി കെ വിജയന്റെ ചെറുമകന്‍ എസ് സുഭാഷിന് കൊളുത്തി നല്‍കുന്ന ദീപശിഖ വിവിധ കേന്ദ്രങ്ങളിലെ സ്വീകരണം ഏറ്റുവാങ്ങി വൈകിട്ട് 6ന് പറവൂരില്‍ എത്തിച്ചേരും.
തുടര്‍ന്ന് വാരാചരണ കമ്മിറ്റി പ്രസിഡന്റ് അഡ്വ. ജി കൃഷ്ണപ്രസാദ് സമരസേനാനി എം എം ചന്ദ്രസേനന്റെ ചെറുമകന്‍ വിഷ്ണുവില്‍ നിന്നും ദീപശിഖ ഏറ്റുവാങ്ങി രക്തസാക്ഷി മണ്ഡപത്തില്‍ സ്ഥാപിക്കും. ആറിന് ചേരുന്ന പൊതുസമ്മേളനം സമരസേനാനി വി എസ് അച്ചുതാനന്ദന്‍ ഉദ്ഘാടനം ചെയ്യും.
അഡ്വ. ജി കൃഷ്ണപ്രസാദ് അധ്യക്ഷനാകും. സി പി ഐ സംസ്ഥാന സെക്രട്ടറി കാനം രാജേന്ദ്രന്‍, മന്ത്രിമാരായ പി തിലോത്തമന്‍, ജി സുധാകരന്‍, സി പി ഐ സംസ്ഥാന എക്‌സിക്യൂട്ടീവ് അംഗം ടി പുരുഷോത്തമന്‍, ജില്ലാ സെക്രട്ടറി ടി ജെ ആഞ്ചലോസ്, സി പി ഐ എം ജില്ലാ സെക്രട്ടറി സജി ചെറിയാന്‍, ജി വേണുഗോപാല്‍, എച്ച് സലാം, എ ഓമനക്കുട്ടന്‍, ഇ കെ ജയന്‍, പ്രജിത്ത് കാരിക്കല്‍, സുവര്‍ണ്ണ പ്രതാപന്‍, എം ഷീജ എന്നിവര്‍ പങ്കെടുക്കും. എന്‍ പി വിദ്യാനന്ദന്‍ സ്വാഗതവും കെ എഫ് ലാല്‍ജി നന്ദിയും പറയും. രാത്രി 9ന് ആലപ്പുഴ നിറവ് നാടന്‍പാട്ട് കൂട്ടത്തിന്റെ നാടന്‍പാട്ടുകളുടെ ദൃശ്യാവിഷ്‌ക്കാരം.
പുന്നപ്ര രക്തസാക്ഷികള്‍ അന്ത്യവിശ്രമം കൊള്ളുന്ന ആലപ്പുഴ വലിയചുടുകാട്ടില്‍ ഇന്ന് വൈകിട്ട് പുഷ്പാര്‍ച്ചനയും ദീപക്കാഴ്ചയും നടക്കും. വൈകിട്ട് 6ന് ചേരുന്ന രക്തസാക്ഷി അനുസ്മരണ സമ്മേളനത്തില്‍ എ രാഘവന്‍ അധ്യക്ഷനാകും.
വി എം ഹരിഹരന്‍ സ്വാഗതം പറയും. അനുസ്മരണ സമ്മേളനം സി പി ഐ സംസ്ഥാന സെക്രട്ടറി കാനം രാജേന്ദ്രന്‍ ഉദ്ഘാടനം ചെയ്യും. ഫിഷറീസ് മന്ത്രി ജെ മേഴ്‌സിക്കുട്ടിയമ്മ, സി പി ഐ ദേശിയ സെക്രട്ടറിയേറ്റ് അംഗം പന്ന്യന്‍ രവീന്ദ്രന്‍, ഭക്ഷ്യസിവില്‍ സപ്ലൈസ് മന്ത്രി പി തിലോത്തമന്‍, പി ജ്യോതിസ്, പി വി സത്യനേശന്‍, അഡ്വ. വി മോഹന്‍ദാസ്, ആര്‍ രാഹുല്‍ എന്നിവര്‍ പങ്കെടുക്കും.