കടുത്തുരുത്തി:ടൂറിസ്റ്റ ബസ് നിര്‍ത്തിയിട്ടിരുന്ന സ്വകാര്യ ബസിന്റെ പിറകിലിടിച്ച് അപകടം. നിരവധിയാത്രക്കാര്‍ക്ക് സാരമായ പരിക്കേറ്റു.ടൂറിസ്റ്റ് ബസ് ഡ്രൈവര്‍ മധുര സ്വദേശി ഷണ്‍മുഖനാഥന്റെ(38) കൈക്ക് പരിക്കുപ്പറ്റി.
കോട്ടയം-എറണാകുളം ഭാഗത്തേക്ക് പോവുകയായിരുന്ന ടൂറിസ്റ്റ് ബസ്സ് നിയന്ത്രണം വിട്ട് വന്ന് കടുത്തുരുത്തി ബസ്സ്‌സ്റ്റോപ്പില്‍ യാത്രക്കാരെ ഇറക്കിക്കൊണ്ടിരുന്ന സ്വകാര്യ ബസ്സിന്റെ പുറകില്‍ ഇടിച്ചാണ് അപകടം. മധുരയില്‍ നിന്നും കൊച്ചി വണ്ടര്‍ലാന്റിലേക്ക് പോവുകയായിരുന്ന ടൂറിസ്റ്റ് ബസും കോട്ടയം-എറണാകുളം റൂട്ടിലോടുന്ന മരിയാട്രാവല്‍സുമാണ് അപകടത്തില്‍പ്പെട്ടത്. ശനിയാഴ്ച രാവിലെ 6 മണിയോടെ കടുത്തുരുത്തി സെന്‍ട്രല്‍ ജംഗ്ഷനില്‍ ബസ്സ്‌സ്റ്റോപ്പിന് സമീപത്താണ് സംഭവം. ഇടിയെത്തുടര്‍ന്ന് നിയന്ത്രണം വിട്ട ബസ്സ് സമീപത്തുളള കടയുടെ പടിയിലേക്ക് ഇടിച്ചുകയറി. അവിടെ സ്ഥാപിച്ച നെയിംബോര്‍ഡിന്റെ ഇരുമ്പുതൂണിലിടിച്ചാണ് ബസ് നിന്നതെന്ന ദൃക്‌സാക്ഷികള്‍ പറയുന്നു. ടൂറിസ്റ്റ് ബസ്സില്‍ 52 പേരോളം ഉണ്ടായിരുന്നുവെങ്കിലും ചിലര്‍ക്ക് സാരമായ പരിക്കേറ്റു. സ്വകാര്യബസ്സിലെ യാത്രക്കാര്‍ക്ക് പരിക്കുകളൊന്നുമില്ല. സംഭവം നടന്ന ഉടനെ ഓടിക്കൂടിയ നാട്ടുകാരും പൊലിസും ഫയര്‍ഫോഴ്‌സ് ഉദ്യോഗസ്ഥരും ചേര്‍ന്ന് അപകടത്തില്‍പ്പെട്ടവരെ മുട്ടുച്ചിറ സ്വകാര്യ ആശുപത്രിയിലേക്ക് പ്രവേശിപ്പിച്ചു. ആരുടേയും പരിക്ക് ഗുരുതരമല്ല.