കരുനാഗപ്പള്ളി: സംസ്ഥാനത്തെ പട്ടിണി പാവങ്ങള്‍ക്ക് ഏറെ ആശ്വാസകരമാകുന്ന തരത്തില്‍ കഴിഞ്ഞ യു.ഡി.എഫ് സര്‍ക്കാര്‍ നടപ്പിലാക്കിയ സൗജന്യ റേഷന്‍ അരി വിതരണം ഘട്ടം ഘട്ടമായി എല്‍.ഡി.എഫ് സര്‍ക്കാര്‍ അട്ടിമറിക്കുവാനുള്ള നടപടികളാണ് സ്വീകരിച്ചു വരുന്നതെന്ന് കോണ്‍ഗ്രസ് ഓച്ചിറ ബ്ലോക്ക് കമ്മിറ്റി ആരോപിച്ചു.
ഇതിന്റെ ഭാഗമായിട്ടാണ് ഈ മാസം 20 കഴിഞ്ഞിട്ടും ബി.പി.എല്‍ കാര്‍ഡ് ഉടമകള്‍ക്ക് 25 കിലോ അരി കൊടുക്കേണ്ടടുത്ത് വെറും 5 കിലോ അരിയും, എ.പി.എല്ലുകാര്‍ക്ക് 3 കിലോ അരിയും മാത്രമാണ് വിതരണം ചെയ്തിരിക്കുന്നതെന്നും കമ്മിറ്റി ചൂണ്ടികാട്ടി. യു.ഡി.എഫ് സര്‍ക്കാരിന്റെ കാലഘട്ടത്തില്‍ വില്ലേജ് അടിസ്ഥാനത്തില്‍ ഭക്ഷ്യ സുരക്ഷ മുന്‍ഗണനാ ലിസ്റ്റ് തയാറാക്കിയത് ഇപ്പോള്‍ എല്‍.ഡി.എഫ് സര്‍ക്കാര്‍ ഇതിനെ ഇല്ലാതാക്കി സംസ്ഥാന തലത്തില്‍ ഒറ്റ മാനദണ്ഡത്തില്‍ ഭക്ഷ്യ സുരക്ഷ മുന്‍ഗണനാ ലിസ്റ്റ് തയാറാക്കുകയാണ്. ഇത് അര്‍ഹരായ പതിനായിരകണക്കിന് ഗുണഭോക്തക്കള്‍ക്ക് ഭക്ഷ്യ സുരക്ഷാ വഴിയുള്ള ആനുകൂല്യങ്ങള്‍ കിട്ടാതെ പോകുമെന്നും കമ്മിറ്റി ചൂണ്ടികാട്ടി 31ന് ഇന്ദിരാഗാന്ധി രക്തസാക്ഷി ദിനത്തോടനുബന്ധിച്ച് ഓച്ചിറ ബ്ലോക്ക് കമ്മിറ്റിയുടെ കീഴിലുള്ള മണ്ഡലം കമ്മിറ്റിയുടെ നേതൃത്വത്തില്‍ ഇന്ദിരാഗാന്ധി സ്തുതി യാത്ര നടത്തുവാനും വവ്വാക്കാവില്‍ പൊതുസമ്മേളനം നടത്തുവാനും കമ്മിറ്റി തീരുമാനിച്ചു. ബ്ലോക്ക് പ്രസിഡന്റ് നീലികുളം സദാനന്ദന്‍ അധ്യക്ഷനായി. ജില്ലാ കോണ്‍ഗ്രസ് ജനറല്‍ സെക്രട്ടറിമാരായ കബീര്‍ എം. തീപ്പുര, കെ.കെ സുനില്‍കുമാര്‍, യൂത്ത് കോണ്‍ഗ്രസ് ആലപ്പുഴ പാര്‍ലമെന്ററി കമ്മിറ്റി ജനറല്‍ സെക്രട്ടറി കെ.എസ് പുരം സുധീര്‍, കളരിക്കല്‍ ജയപ്രകാശ്, കയ്യാലത്തറ ഹരിദാസ്, വി.പി.എസ് മേനോന്‍, എസ്.എം ഇക്ബാല്‍, അശോകന്‍ കുറുങ്ങപ്പള്ളി, യതീഷ്, ഓച്ചിറ ഹരിലാല്‍, നീലികുളം രാജു, അഡ്വ.ജീവന്‍, അലാവുദ്ദീന്‍, മുഹമ്മദ്കുഞ്ഞ്, കെ.എന്‍ പത്മനാഭന്‍പിള്ള, ശ്രീകുമാര്‍ ക്ലാപ്പന സംസാരിച്ചു.