താനൂര്‍: താനൂര്‍ ഉപജില്ലാ ശാസ്‌ത്രോല്‍സവത്തിന് ഇന്നു തെയ്യാലിങ്ങല്‍ എസ്.എസ്.എം.എച്ച്.എസ്.എസ് സ്‌കൂളില്‍ തുടക്കമാവും. മൂന്നു ദിവസം നീണ്ടു നില്‍ക്കുന്ന മേളയില്‍ ഉപജില്ലയിലെ 115 സ്‌കൂളുകളില്‍ നിന്നായി 2200 മത്സരാര്‍ഥികള്‍ പങ്കെടുക്കും. ഐ.ടി, ഗണിത ശാസ്ത്രം, സയന്‍സ്, സാമൂഹ്യം, പ്രവൃത്തിപരിചയം എന്നിങ്ങനെ അഞ്ചിനങ്ങളിലായാണു മത്സരം.
ഇന്നു രജിസ്‌ട്രേഷനും തുടര്‍ന്ന് ഐ.ടി ശാസ്ത്ര ക്വിസ് മത്സരവും നടക്കും. നാളെ 9.30ന് എ.ഇ .ഒ രവീന്ദ്രന്‍ പതാക ഉയര്‍ത്തും. ഇ.ടി മുഹമ്മദ് ബഷീര്‍ എം.പി ഉദ്ഘാടനം ചെയ്യും. തുടര്‍ന്നു കുട്ടികള്‍ക്കും പൊതു ജനങ്ങള്‍ക്കുമുള്ള പ്രദര്‍ശനം നടക്കും. 26നു മേളയുടെ സമാപന സമ്മേളനം മലപ്പുറം ജില്ലാ പഞ്ചായത്ത് പ്രസിഡന്റ് എ.പി ഉണ്ണികൃഷ്ണന്‍ ഉദ്ഘാടനം ചെയ്യും. നന്നമ്പ്ര പഞ്ചായത്ത് പ്രസിഡന്റ് മുഹമ്മദ് ഹസന്‍, പി.ടി.എ പ്രസിഡന്റ് അബ്ദുല്‍ റഷീദ്, താനൂര്‍ എ.ഇ.ഒ ഗോപാലകൃഷ്ണന്‍, പ്രന്‍സിപ്പല്‍ ശംസുദ്ദീന്‍, രാജീവന്‍, രവീന്ദ്രന്‍, നഗരസഭാ പ്രതിനിധികളും പഞ്ചായത്ത് അംഗങ്ങളും നേതാക്കളും പങ്കെടുക്കും.