തളിപ്പറമ്പ്: ഷോപ്പിങ് കോംപ്ലക്‌സിനു മുകളില്‍ നിന്നു താഴോട്ട് ചാടാനുള്ള ശ്രമത്തിനിടയില്‍ രണ്ടാം നിലയിലെ സണ്‍ഷേഡില്‍ കുടുങ്ങിയ യുവാവിനെ അഗ്നിരക്ഷാസേന രക്ഷപ്പെടുത്തി.
ഇന്നലെ വൈകുന്നേരം മൂന്നോടെ തളിപ്പറമ്പ് ദേശീയപാതയോരത്തെ കെ.വി കോംപ്ലക്‌സിന്റെ മൂന്നാം നിലയില്‍ നിന്നു താഴേക്കു ചാടിയ അരിയില്‍ സ്വദേശി സിദ്ദിക്കാ(34)ണു ചാട്ടം പിഴച്ചു രണ്ടാം നിലയിലെ സണ്‍ഷേഡില്‍ വീണത്. കാലിനു പരുക്കേറ്റു നിലവിളിച്ച ഇയാളെ കണ്ട നാട്ടുകാര്‍ അഗ്നിരക്ഷാസേനയെ വിവരമറിയിക്കുകയായിരുന്നു.
തളിപ്പറമ്പ് അഗ്നിശമന നിലയത്തിലെ അസി.സ്റ്റേഷന്‍ ഓഫിസര്‍ പ്രേമരാജന്‍ കക്കാടിയുടെ നേതൃത്വത്തിലെത്തിയ സേനാംഗങ്ങള്‍ ഏണിവച്ച് മുകളില്‍ കയറി പരുക്കേറ്റ  സിദ്ദിക്കിനെ വല ഉപയോഗിച്ച് താഴെ എത്തിക്കുകയായിരുന്നു. ഇയാള്‍ ലഹരിയിലായിരുന്നുവെന്നു പൊലിസ് പറഞ്ഞു.
പരുക്കേറ്റ ഇയാള്‍ക്കു തളിപ്പറമ്പ് താലൂക്ക് ആശുപത്രിയില്‍ പ്രാഥമിക ചികിത്സ നല്‍കി. ലീഡിങ്ങ് ഫയര്‍മാന്‍ കെ രാജീവന്‍, സേനാംഗങ്ങളായ ഗിരീഷ്, രഞ്ചു, മുഹമ്മദ് ശമീം, ചന്ദ്രന്‍, ദിലീപ് എന്നിവര്‍ നാല്‍പ്പതുമിനുട്ടോളം ശ്രമം നടത്തിയാണ് സിദ്ദിക്കിനെ താഴെയിറക്കിയത്. തളിപ്പറമ്പ് പൊലിസും സ്ഥലത്തെത്തിയിരുന്നു.