ഇംഫാല്‍: മണിപ്പൂര്‍ മുഖ്യമന്ത്രി ഒക്‌റോം ഇബോബി സിങിനു നേരെ വധശ്രമം. ഉഖ്രൂല്‍ ജില്ലാ ആസ്ഥാനത്തിനു സമീപത്തുവെച്ചാണ് സംഭവം. ഇബോബി സഞ്ചരിച്ച ഹെലികോപ്റ്ററിനു നേരെ തീവ്രവാദികള്‍ വെടിയുതിര്‍ക്കുകയായിരുന്നു. തലനാരിഴയ്ക്കാണ് മുഖ്യമന്ത്രി രക്ഷപ്പെട്ടത. ആക്രമത്തില്‍ രണ്ട് മണിപ്പൂരി റൈഫിള്‍സ് ജവാന്മാര്‍ക്ക് പരുക്കേറ്റു.

ഇംഫാലില്‍ നിന്നും ഉപമുഖ്യമന്ത്രി ഗയ്കങ്ങാമുനൊപ്പം ഉഖ്രൂരിലെ ആശുപത്രി ഉദ്ഘാടനത്തിനായി 9.30 ഓടു കൂടിയാണ് മുഖ്യമന്ത്രി ഹെലികോപ്റ്ററില്‍ എത്തിയത്. ഹെലികോപ്റ്ററില്‍ നിന്നും ഇറങ്ങുന്നതിനിടെ മുഖ്യമന്ത്രിയെ ലക്ഷ്യമാക്കി തീവ്രവാദികള്‍ വെടിയുതിര്‍ക്കുകയായിരുന്നു. സംഭവത്തെ തുടര്‍ന്ന് മുഖ്യമന്ത്രിയും സംഘവും ഇംഫാലിലേക്ക് തന്നെ മടങ്ങി.