കായംകുളം: വെട്ടുകേസിലെ പ്രതിയെ പിടികൂടാനെത്തിയ എ.എസ്.ഐ ഉള്‍പ്പടെയുള്ള പൊലിസ് സംഘത്തെ പ്രതിയുടെ പിതാവ് മാരകായുധങ്ങളുമായി വെട്ടിപ്പരിക്കേല്‍പ്പിച്ച സംഭവത്തില്‍ പ്രതികള്‍ക്കുവേണ്ടി പൊലിസ് അന്വേഷണം ഊര്‍ജിതമാക്കി.
വെട്ടുകേസിലെ രക്ഷപ്പെട്ട പ്രതി കുറ്റിത്തെരുവ് ദേശത്തിനകം കാട്ടിരേത്ത് തെക്കേതില്‍ ഉണ്ണികൃഷ്ണന്‍ പൊലിസിനെ ആക്രമിച്ച ഇയാളുടെ പിതാവ് ചെത്തുതൊഴിലാളിയായ ഗോപാലകൃഷ്ണന്‍ എന്നിവര്‍ക്കുവേണ്ടിയാണ് തെരച്ചില്‍ ശക്തമാക്കിയത്. പ്രതികള്‍ ഒളിവില്‍ താമസിക്കാന്‍ സാധ്യതയുള്ള സ്ഥലങ്ങള്‍ കേന്ദ്രീകരിച്ചാണ് പൊലിസ് ഇപ്പോള്‍ അന്വേഷണം നടത്തുന്നത് .ഇന്നലെ പൊലിസിനെ ആക്രമിക്കാന്‍ പ്രതി ഉപയോഗിച്ച ഇരുമ്പ് പൈപ്പ്,വെട്ടുകത്തി തുടങ്ങിയ ആയുധങ്ങള്‍ പൊലിസ് സ്ഥലത്ത് നിന്നും കണ്ടെടുത്തു.എന്നാല്‍ എ.എസ്.ഐയെ മാരകമായി കുത്താന്‍ ഉപയോഗിച്ച തെങ്ങ് ചെത്തുന്ന തേര്‍ കണ്ടെത്താന്‍ കഴിഞ്ഞില്ല. ആലപ്പുഴയില്‍ നിന്നും ശീതളിന്റെ നേതൃത്വത്തില്‍ ഫോറന്‍സിക് സംഘവും സ്ഥലത്തെത്തി തെളിവെടുപ്പ് നടത്തി .ആലപ്പുഴ എസ്.പിയുടെ നിര്‍ദേശ പ്രകാരം കായംകുളം സി.ഐ സദന്റെ നേതൃത്വത്തില്‍ പ്രത്യേക സംഘങ്ങളായി തിരിഞ്ഞാണ് പ്രതികള്‍ക്കുവേണ്ടി പൊലിസ് ഇപ്പോള്‍ അന്വേഷണം നടത്തുന്നത്. കരീലക്കുളങ്ങര പൊലിസ് സ്റ്റേഷനിലെ എ.എസ്.ഐ സിയാദ് സിവില്‍ പൊലിസ് ഓഫീസര്‍മാരായ ഇക്ബാല്‍,സതീഷ് എന്നിവര്‍ക്കാണ് കഴിഞ്ഞ ദിവസം വൈകുന്നേരം വെട്ടേറ്റത്. സി.പി.ഒ രാജേഷിനെ ക്രൂരമായി മര്‍ദിക്കുകയും ചെയ്തു .ഗുരുതര പരുക്കേറ്റ എ.എസ്.ഐ സിയാദിനെ എറണാകുളത്തെ സ്വകാര്യ ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിച്ചിരിക്കുകയാണ്.പരുക്കേറ്റ പൊലിസുകാരെ ആലപ്പുഴ മെഡിക്കല്‍ കോളജിലും പ്രവേശിപ്പിച്ചിട്ടുണ്ട്. ഞായറാഴ്ച വൈകുന്നേരം അഞ്ചരയോടെ കുറ്റിത്തെരുവ് ദേശത്തിനകത്ത് വച്ചാണ് പൊലിസിന് നേരെ ആക്രമണം ഉണ്ടായത്. മൂന്നു ദിവസം മുമ്പ് കടത്തിണ്ണയില്‍ നിന്ന രണ്ടു യുവാക്കളെ വെട്ടിപ്പരിക്കേല്‍പ്പിച്ച കേസിലെ പ്രതിയായിരുന്നു ഉണ്ണികൃഷ്ണന്‍. ഇയാള്‍ സ്ഥലത്ത് ഉണ്ടെന്നറിഞ്ഞാണ് പൊലിസ് സംഘം എത്തിയത്. വഴിയില്‍ വച്ച് പ്രതിയെ കണ്ട പൊലിസ് ഇയാളെ പിടികൂടി ജീപ്പില്‍ കയറ്റി എന്നാല്‍ ഇയാള്‍ ചാടി രക്ഷപ്പെടാന്‍ ശ്രമിച്ചു. ഓടി കൂടിയ നാട്ടുകാരില്‍ ചിലര്‍ പ്രതിയെ രക്ഷപ്പെടുത്താന്‍ വേണ്ടി പൊലിസിനെ തടയാന്‍ ശ്രമിച്ചു.എന്നാല്‍ പൊലിസ് ബലപ്രയോഗത്തിലൂടെ പ്രതിയെ വിലങ്ങുവച്ച് വാഹനത്തില്‍ കയറ്റി. ഈ സമയമാണ് സ്ഥലത്ത് എത്തിയ പ്രതിയുടെ അച്ഛന്‍ ചെത്ത് തൊഴിലാളിയായ ഗോപാലകൃഷ്ണന്‍ പൊലിസിന് നേരെ ആക്രമണം അഴിച്ചുവിട്ടത്. മകനെ ഇറക്കിവിടണമെന്ന് ആവശ്യപ്പെട്ട് കമ്പി വടികൊണ്ട് ഇക്ബാലിന്റെ തലയ്ക്കടിച്ച് വീഴ്ത്തുകയും തടയാന്‍ എത്തിയ എ.എസ്.ഐ സിയാദിനെ കള്ള് ചെത്താന്‍ ഉപയോഗിക്കുന്ന തേര്‍ ഉപയോഗിച്ച് നെഞ്ചത്ത് കുത്തുകയുമായിരുന്നു. തേര്‍ തെറിച്ചുവീണപ്പോള്‍ ഇയാളെ കീഴ് പെടുത്താന്‍ ശ്രമിച്ച പൊലിസുകാരന്‍ സതീഷിനെ വെട്ടുകത്തി ഉപയോഗിച്ച് ഇയാള്‍ വെട്ടി.
പിന്നീട് പൊലിസുകാരന്‍ രാജേഷിനെയും ഇയാള്‍ മര്‍ദിച്ചു. ആയുധവുമായി ഇയാള്‍ വീണ്ടും പാഞ്ഞടുത്തപ്പോള്‍ പൊലിസുകാര്‍ സമീപത്തെ വീടുകളില്‍ അഭയം തേടി. ഈ സമയം വിലങ്ങുമായി പ്രതിയും സ്‌കൂട്ടറില്‍ പൊലിസിനെ ആക്രമിച്ച പ്രതിയുടെ പിതാവും രക്ഷപ്പെടുകയായിരുന്നു. പ്രതികളുടെ മൊബൈല്‍ ഫോണ്‍ ടവര്‍ ലൊക്കേഷന്‍ കേന്ദ്രീകരിച്ചും പൊലിസ് അന്വേഷണം ഊര്‍ജിതമാക്കിയിട്ടുണ്ട്. ഒളിവില്‍ പോയ ഗോപാലകൃഷ്ണന്‍ നിരവധി കേസിലെ പ്രതിയാണന്ന് പൊലിസ് പറഞ്ഞു.