ഈരാററുപേട്ട: പുതിയ റേഷന്‍ കാര്‍ഡുകളുടെ വിതരണം അടുത്തവര്‍ഷം ഫെബ്രുവരിയില്‍ നടക്കാനിരിക്കെ ജില്ലയില്‍ സിവില്‍ സപ്ലൈസ് കോര്‍പറേഷന്‍ പ്രസിദ്ധീകരിച്ച മുന്‍ഗണനാ പട്ടികയില്‍ വ്യാപക ക്രമക്കേടുകള്‍. അനര്‍ഹര്‍ ഒട്ടേറെ പട്ടികയില്‍ ഉള്‍പ്പെട്ടപ്പോള്‍ അര്‍ഹതപ്പെട്ട പലരും പട്ടികയില്‍നിന്ന് പുറത്തായി.
മുന്‍ഗണനാ വിഭാഗത്തില്‍പ്പെട്ടവരുടെ എണ്ണം ഗണ്യമായി വര്‍ധിച്ചതായാണു വിവരം. 2014 അവസാനം റേഷന്‍ കാര്‍ഡ് പുതുക്കാനുള്ള ഫോറത്തില്‍ ഗൃഹനാഥന്‍ സാക്ഷ്യപ്പെടുത്തിയ വിവരം ഉള്‍പ്പെടുത്തി കഴിഞ്ഞ ദിവസമാണു യോഗ്യതാ പട്ടിക പ്രസിദ്ധീകരിച്ചത്. ദേശീയ ഭക്ഷ്യസുരക്ഷാ നിയമത്തിന്റെ ഭാഗമായാണു നടപടി.
വരുമാനം, ജോലി, സ്വത്ത് തുടങ്ങിയവ സംബന്ധിച്ച് ഗുണഭോക്താക്കള്‍ നല്‍കിയ വിവരങ്ങള്‍ പലതും യാഥാര്‍ഥ്യമല്ല. ഇതാണ് അനര്‍ഹര്‍ പലരും പട്ടികയില്‍ കയറിക്കൂടാന്‍ കാരണം. സര്‍ക്കാര്‍ ജീവനക്കാരും സാമ്പത്തികമായി മുന്നാക്കം നില്‍ക്കുന്നവരും മുന്‍ഗണനാ പട്ടികയില്‍ ഉള്‍പ്പെട്ടിട്ടുണ്ട്. മുന്‍സിപ്പാലിററികളിലുംഗ്രാമപ്പഞ്ചായത്തുകളിലും വില്ലേജ് ഓഫിസുകളിലും കാര്‍ഡുടമകള്‍ക്ക് പരിശോധിക്കാന്‍ കോപ്പി ലഭിച്ചെങ്കിലും തിരക്കുകാരണം പലര്‍ക്കും നിരാശരായി മടങ്ങേണ്ടി വന്നു.
എ.എ.വൈ, മുന്‍ഗണനയുള്ളവര്‍, ഇല്ലാത്തവര്‍, സംസ്ഥാന മുന്‍ഗണന എന്നിങ്ങനെ വ്യത്യസ്ത തരത്തിലുള്ള ലിസ്റ്റാണ് പ്രസിദ്ധീകരിച്ചിട്ടുണ്ട്. പല മേഖലയിലും അര്‍ഹര്‍ പുറത്തും അനര്‍ഹര്‍ അകത്തും കടന്നുകുടിയതായും വ്യാപക പരാതിയുണ്ട്. പരാതിയിലുള്ളവര്‍ 30 വരെയുള്ള തിയ്യതികളില്‍ താലൂക്ക് സപ്ലൈ ഓഫിസുകളില്‍ പരാതി സമര്‍പ്പിക്കാനാണു നിര്‍ദേശം നല്‍കിയിട്ടുള്ളത്.
മലയോര മേഖലകളില്‍ വ്യാപക അപാകതകളാണ് റിപോര്‍ട്ട് ചെയ്തിട്ടുള്ളത്. പരാതികള്‍ നല്‍കാനുള്ള 10 ദിവസം പോരെന്നും 20 ദിവസം ആക്കണമെന്നും പരാതികള്‍ അതത് റേഷന്‍ കടകളില്‍ നല്‍കാന്‍ സൗകര്യമൊരുക്കണമെന്നും ആവശ്യം ഉയര്‍ന്നിട്ടുണ്ട്. റേഷന്‍ കാര്‍ഡ് പ്രധാന രേഖയായതിനാല്‍ കുറ്റമറ്റതും സത്യസന്ധവും ആകണമെന്നാണ് കാര്‍ഡുടമകളുടെ ആവശ്യം.