കുടിവെള്ളം നിലച്ചുബോവിക്കാനം: കുഴല്‍ കിണറില്‍ സ്ഥാപിച്ച മോട്ടോര്‍ തകരാറിലായതിനെ തുടര്‍ന്ന്  മുളിയാര്‍ പഞ്ചായത്തിലെ കാനത്തൂര്‍, പള്ളം, പയൊലം, കൊറത്തിക്കുണ്ട് ഭാഗങ്ങളില്‍ മൂന്ന് മാസമായി കൂടി വെള്ളം നിലച്ചു. 22 കുടുംബങ്ങളാണ് കുടിവെള്ളം കിട്ടാതെ ദുരിതമനുഭവിക്കുന്നത്. ലക്ഷങ്ങള്‍ ചിലവഴിച്ച് നിര്‍മിച്ച ജലസംഭരണിയും പൈപ്പുകളും നോക്കുകുത്തിയായിരിക്കുകയാണിപ്പോള്‍. പദ്ധതിയുടെ ഉപഭോക്താക്കള്‍ പിരിവെടുത്ത് ഇരുപതിനായിരത്തോളം രൂപ ചെലവാക്കി ഒരു തവണ മോട്ടോര്‍ നന്നാക്കിയെങ്കിലും രണ്ട് ദിവസം മാത്രമാണിത് ഉപയോഗിച്ചത്. മോട്ടോര്‍ വീണ്ടും കേടായി ജലവിതരണം നിലച്ചതോടെ കിലോ മീറ്ററുകള്‍ ദുരെ നിന്നും തലച്ചുമടായാണ് ഇപ്പോള്‍ കുടിക്കാനും മറ്റ് വീട്ടാവശ്യങ്ങള്‍ക്കും വെള്ളമെത്തിക്കുന്നത്. തകരാറിലായ മോട്ടോര്‍ നന്നാക്കി കുടിവെള്ള വിതരണ പദ്ധതി പുനസ്ഥാപിക്കണമെന്നാവശ്യപ്പെട്ട് നിരവധി തവണ അധികൃതരെ സമീപിച്ചെങ്കിലും ഇതുവരെയായി ഒരു നടപടിയും ഉണ്ടായിട്ടിലെന്നാണ് നാട്ടുകാര്‍ ആരോപിക്കുന്നത്.