കല്‍പ്പറ്റ: കേണിച്ചിറ ബസ് പാസഞ്ചേഴ്‌സ് അസോസിയേഷന്‍ സെക്രട്ടറി വി.എസ് പങ്കജാക്ഷനെ മര്‍ദിച്ചവര്‍ക്കെതിരെ നടപടിയെടുക്കാതെ വാദിയെ പ്രതിയാക്കി മീനങ്ങാടി പൊലിസ് നിയമസംവിധാനത്തെ വെല്ലുവിളിക്കുകയാണെന്ന് ഭാരവാഹികള്‍ പത്രസമ്മേളനത്തില്‍ കുറ്റപ്പെടുത്തി.
ഈ വിഷയത്തില്‍ പൊലിസ് നിരുത്തരവാദിത്വപരവും നിന്ദ്യവുമായ സമീപനമാണ് സ്വീകരിക്കുന്നത്. അക്രമികള്‍ നല്‍കിയ പരാതിയുടെ അടിസ്ഥാനത്തില്‍ പൊലിസ് പങ്കജാക്ഷനെ പ്രതിയാക്കി ശക്തമായ വകുപ്പുകള്‍ ചേര്‍ത്ത് കേസെടുത്തു. എന്നാല്‍ അക്രമികള്‍ക്കെതിരെ ദുര്‍ബലമായ വകുപ്പുകള്‍ ചേര്‍ത്താണ് കേസെടുത്തിരിക്കുന്നത്. രാഷ്ട്രീയ ഇടപെടലുകളോ സാമ്പത്തിക നേട്ടമോ ആണ് പൊലിസിന്റെ ഈ പ്രവര്‍ത്തിക്കു കാരണമെന്ന് സംശയമുണ്ട്. ഈ മാസം 28നുള്ളില്‍ കുറ്റക്കാര്‍ക്കെതിരെ നടപടിയെടുത്തില്ലെങ്കില്‍ 29ന് റോഡുപരോധമടക്കമുള്ള സമരപരിപാടികള്‍ക്ക് നേതൃത്വം നല്‍കുമെന്നും ഭാരവാഹികള്‍ പറഞ്ഞു.
ഈ മാസം 16ന് രാത്രി ഒമ്പതു മണിയോടെയാണ് ചൂതുപാറ മാനികാവ് ക്ഷേത്രത്തിനു സമീപത്തുവെച്ച് പങ്കജാക്ഷനെ മൂന്ന് പേര്‍ ചേര്‍ന്ന് ആക്രമിച്ച് പരുക്കേല്‍പ്പിച്ചത്. ബത്തേരി- മാനന്തവാടി റൂട്ടിലെ സ്വകാര്യ ബസ് ലോബിക്കെതിരെ അസോസിയേഷന്‍ പ്രതികരിച്ചതിനാലാണ് സെക്രട്ടറിക്ക് മര്‍ദനമേറ്റത്. സ്വകാര്യ ബസുകള്‍ നിയമവിരുദ്ധമായി തോന്നും പോലെയാണ് ഇതുവഴി സര്‍വിസ് നടത്തിയിരുന്നത്. കെ.എസ്.ആര്‍.ടി.സിയെ തകര്‍ക്കാനും ജീവനക്കാരെ കൈയ്യേറ്റം ചെയ്യാനും ശ്രമിച്ചപ്പോഴാണ് അസോസിയേഷന്‍ സ്വകാര്യ ബസ് ലോബിക്കെതിരെ ഹൈക്കോടതിയെ സമീപിച്ചത്. ഈ റൂട്ടില്‍ കെ.എസ്.ആര്‍.ടി.സി ബസുകള്‍ സ്ഥിരമായി ഓടിക്കണമെന്നും അതിനു തടസം നില്‍ക്കരുതെന്നും ഹൈക്കോടതി ഉത്തരവിട്ടു.
ഇതില്‍ വൈരാഗ്യം പൂണ്ട് അവര്‍ തങ്ങളെ കയ്യേറ്റം ചെയ്യുമെന്നും കൊല്ലുമെന്നും പരസ്യമായി ഭീഷണിപ്പെടുത്തുകയും, തങ്ങള്‍ക്കെതിരെ അസഭ്യം പറഞ്ഞ് ബത്തേരി ടൗണില്‍ പ്രകടനം നടത്തുകയും ചെയ്തു. പൊലിസ് സംരക്ഷണമാവശ്യപ്പെട്ട് കോടതിയെ സമീപിച്ചിട്ടുണ്ടെന്നും ഭാരവാഹികള്‍ പറഞ്ഞു.