സൂറിച്ച്: ബയേണ്‍ മ്യൂണിക്കിലെ പോര്‍ച്ചുഗല്‍ മധ്യനിര താരം റെനാറ്റോ സാഞ്ചസിനു യൂറോപ്യന്‍ ഗോള്‍ഡന്‍ ബോയ് പുരസ്‌കാരം. 21 വയസ്സിനു താഴെയുള്ള യൂറോപ്പ്യന്‍ ക്ലബുകളില്‍ കളിക്കുന്ന താരത്തിനുള്ള പുരസ്‌കാരമാണിത്. മാഞ്ചസ്റ്റര്‍ യുനൈറ്റഡിലെ ഇംഗ്ലീഷ് താരം മാര്‍ക്കസ് റാഷ്‌ഫോര്‍ഡ്, ബയേണിലെ സഹതാരമായ ഫ്രാന്‍സിന്റെ കിങ്‌സ്‌ലി കോമന്‍ എന്നിവരെ പിന്തള്ളിയാണ് സാഞ്ചസ് പുരസ്‌കാരം സ്വന്തമാക്കിയത്. മോണ്ടെ കാര്‍ലോയില്‍ നടന്ന ചടങ്ങില്‍ താരം പുരസ്‌കാരം ഏറ്റുവാങ്ങി.
മുന്‍ വര്‍ഷങ്ങളില്‍ വെയ്ന്‍ റൂണി, റഹിം സ്റ്റെര്‍ലിങ്, ലയണല്‍ മെസ്സി, സെര്‍ജിയൊ അഗ്യെറോ എന്നിവര്‍ ഗോള്‍ഡന്‍ ബോയ് പുരസ്‌കാരം നേടിയിട്ടുണ്ട്.