ന്യൂഡല്‍ഹി: അടുത്ത വര്‍ഷം ഇന്ത്യയില്‍ നടക്കുന്ന അണ്ടര്‍ 17 ലോകകപ്പ് ഫുട്‌ബോളിന്റെ തിയതികള്‍ പ്രഖ്യാപിച്ചു. 2017 ഒക്ടോബര്‍ ആറു മുതല്‍ 28 വരെ ഇന്ത്യയിലെ ആറു വേദികളിലായാണ് മത്സരം. കേരളത്തിലെ കൊച്ചി, ഗോവ, ഗുവാഹത്തി, നവി മുംബൈ, ന്യൂ ഡല്‍ഹി, കൊല്‍ക്കത്ത എന്നിവിടങ്ങളിലാണ് വേദികള്‍. ഫിഫയുടെ വിദഗ്ധ സംഘം കൊല്‍ക്കത്തയിലെ സാല്‍ട്ട് ലെയ്ക് സ്റ്റേഡിയം സന്ദര്‍ശിച്ച് വേദിക്ക് പച്ചക്കൊടി കാട്ടിയതോടെ ആറു വേദികള്‍ സംബന്ധിച്ച് ഒദ്യോഗിക തീരുമാനമായി. ഫൈനല്‍ മത്സരം കൊല്‍ക്കത്തയില്‍ അരങ്ങേറും. അടുത്ത വര്‍ഷം ജൂലൈ ഏഴിനു മത്സര ക്രമം സംബന്ധിച്ച് തീരുമാനമെടുക്കും.
ഇതാദ്യമായാണ് ഫിഫ ലോകകപ്പ് ഫുട്‌ബോളിനു ഇന്ത്യ വേദിയാകുന്നത്. ഇന്ത്യയില്‍ വിരുന്നെത്തുന്ന ഏറ്റവും വലിയ ഫുട്‌ബോള്‍ മാമാങ്കമാണ് അണ്ടര്‍ 17 ലോകകപ്പ്. ആതിഥേയരായ ഇന്ത്യയടക്കം 24 ടീമുകളാണ് ടൂര്‍ണമന്റില്‍ മാറ്റുരയ്ക്കുന്നത്. 23 ടീമുകള്‍ യോഗ്യതാ റൗണ്ട് കളിച്ചെത്തിയപ്പോള്‍ ഇന്ത്യക്ക് ആതിഥേയരെന്ന നിലയിലാണ് മത്സരിക്കാന്‍ അവസരം ഒരുങ്ങിയത്.