ടൊറോന്റോ: ദിനോസറുകളെക്കുറിച്ച് പൊതുവെയുള്ള ധാരണ ഇതൊരു ഭീകര ജീവിയായിരുന്നുവെന്നാണ്. വനത്തിനുള്ളില്‍ വസിക്കുന്ന ഭീമാകാരനായ ഈ ജീവി വര്‍ഗം ക്രൂരതയുടെ നേര്‍സാക്ഷ്യമെന്നുമായിരുന്നു കേട്ടറിവുകള്‍.
എന്നാല്‍ ദിനോസറുകള്‍ അത്തരത്തിലുള്ള ജീവികളായിരുന്നില്ലെന്നാണ് പുതിയ കണ്ടെത്തല്‍. നാട്ടില്‍ വളര്‍ത്തുന്ന മൃഗങ്ങളെപ്പോലെ ഇണക്കമുള്ള ജീവിയായിരുന്നു എന്നാണ് കാനഡ അല്‍ബെര്‍ട്ട സര്‍വകലാശാലയിലെ ശാസ്ത്രജ്ഞന്മാരുടെ  കണ്ടെത്തല്‍.
പൗരാണിക സങ്കല്‍പത്തില്‍ ദിനോസറുകള്‍ ക്രൂരന്മാരും കണ്ണില്‍കണ്ടതെല്ലാം തിന്നു നശിപ്പിക്കുന്ന ജീവികളെന്നുമായിരുന്നു ധാരണ. എന്നാല്‍ ഇത് മാറ്റിയെടുക്കേണ്ട സാഹചര്യമാണ് ഇപ്പോഴുള്ളതെന്ന് ശാത്രജ്ഞന്മാര്‍ പറയുന്നു.
ഇവയെക്കുറിച്ചുള്ള ഗവേഷണത്തില്‍ ഈ മൃഗങ്ങള്‍ സാധുക്കളും വീട്ടുമൃഗങ്ങളെപ്പോലെയുള്ളവയാണെന്നുമാണ് അല്‍ബെര്‍ട്ടാ സര്‍വകലാശാലയിലെ ശാസ്ത്രജ്ഞന്മാരുടെ കണ്ടെത്തല്‍. ലഭ്യമായ തെളിവുകളുടെ അടിസ്ഥാനത്തില്‍ ഇവ ഒരു സാമൂഹിക ജീവിയായിരുന്നുവെന്നും കൂട്ടമായി ജീവിക്കാന്‍ ഇഷ്ടപ്പെട്ടവയായിരുന്നുവെന്നും പറയപ്പെടുന്നു. കൂട്ടമായി ജീവിക്കുന്ന ഇവ കൂട്ടമായിതന്നെ ചത്തൊടുങ്ങുകയായിരുന്നുവെന്നാണ് കണ്ടെത്തല്‍.
മംഗോളിയയില്‍ നടത്തിയ ഗവേഷണത്തില്‍ ഏതോ  ഏറ്റുമുട്ടലില്‍ ഇവ ചത്തൊടുങ്ങുകയായിരുന്നുവെന്നാണ് ഫോസിലുകളെക്കുറിച്ച് പഠിക്കുന്ന ശാസ്ത്രജ്ഞന്മാരുടെ അഭിപ്രായം. ഇവിടെ നടത്തിയ അന്വേഷണത്തില്‍ ആയിരക്കണക്കിന് അസ്ഥികൂടങ്ങളാണ് കണ്ടെത്തിയത്. ഇതുസംബന്ധിച്ച് നേരത്തെയുണ്ടായിരുന്ന ധാരണകള്‍ക്ക് വിരുദ്ധമാണ് ഇപ്പോഴത്തെ നിഗമനം. സംഘം ചേര്‍ന്ന് ജീവിക്കുന്ന പക്ഷികളെപ്പോലെയായിരുന്നു ദിനോസറുകളെന്നും പറയപ്പെടുന്നു.
അതേസമയം ഇവ കൂട്ടത്തോടെ എങ്ങനെയാണ് ചത്തൊടുങ്ങിയതെന്ന നിഗൂഢത കണ്ടെത്താനായിട്ടില്ലെന്നും ശാസ്ത്രജ്ഞര്‍ വ്യക്തമാക്കുന്നു.