തേഞ്ഞിപ്പലം:  വനിതകള്‍ക്ക് വസ്ത്ര നിര്‍മാണത്തിലും ഫാഷന്‍ ഡിസൈനിംഗിലും പരിശീലനം നല്‍കുന്ന പദ്ധതിയില്‍ പങ്കെടുത്ത പഠിതാക്കള്‍ക്കു നല്‍കാത്ത ഭക്ഷണത്തിന് ഇല്ലാത്ത ഹോട്ടലിന്റെ വ്യാജ ബില്‍ നല്‍കി പണം അപഹരിച്ചതായി ഓഡിറ്റ് വിഭാഗം കണ്ടെത്തി. പഠിതാക്കള്‍ക്കു മൂന്നു നേരം ഭക്ഷണം നല്‍കിയെന്നു കാണിച്ചു തേഞ്ഞിപ്പലത്തെ ഒരു സ്ഥാപനത്തിന്റെ ബില്ലാണ് ഓഡിറ്റിംഗിന് നല്‍കിയിരിക്കുന്നത്.
എന്നാല്‍ അങ്ങനെ ഒരു സ്ഥാപനം തേഞ്ഞിപ്പലത്തില്ല. ഇക്കാര്യം നിലവിലെ പഞ്ചായത്ത് സെക്രട്ടറി തന്നെ ഓഡിറ്റ് വിഭാഗത്തെ അറിയിച്ചിരുന്നു. പഠിതാക്കള്‍ക്കു ഭക്ഷണം നല്‍കുന്നതും പതിവില്ല. ഈ സാഹചര്യത്തിലാണ് നല്‍കാത്ത ഭക്ഷണത്തിന് ഇല്ലാത്ത ഹോട്ടലിന്റെ ബില്‍ നല്‍കിയത്. ഈ പദ്ധതിയില്‍ ഓഡിറ്റ് വിഭാഗം അംഗീകരിക്കാത്ത ചെലവുകള്‍ പദ്ധതി നിര്‍വഹണ ഉദ്യോഗസ്ഥരില്‍ നിന്നും ഈടാക്കണമെന്നും സമഗ്രമായ അന്വേഷണം നടത്തണമെന്നും ഓഡിറ്റ് വിഭാഗം റിപ്പോര്‍ട്ടില്‍ ആവശ്യപ്പെട്ടിട്ടുണ്ട്.