മഞ്ചേരി: മഞ്ചേരി പയ്യനാട് സ്റ്റേഡിയത്തില്‍ ജില്ലാ എ ഡിവിഷന്‍ ഫുട്‌ബോളിനു പുറമെ ബി ഡിവിഷനുമെത്തുന്നു. നവംബര്‍ അഞ്ചിനും ആറിനുമാണ് ഉദ്ഘാടന മത്സരങ്ങള്‍. രാവിലെ 7.30നു ബി.ഡിവിഷനും   വൈകുന്നേരം നാലിന് എ ഡിവിഷനും  കളിക്കളത്തിലിറങ്ങും. ബി.ഡിവിഷനില്‍  എന്‍.എസ്.എസ് കോളജ് മഞ്ചേരി, ഇന്റിപെന്റന്റ്  സോക്കര്‍ ക്ലബ്ബ് മങ്കട,  ഇ.എം.ഇ.എ കോളജ് കൊണ്ടോട്ടി, ബ്രദേഴ്‌സ് തിരൂര്‍, ജൂനിയര്‍ബാസ്‌കോ ഒതുക്കുങ്ങല്‍, റോയല്‍ എഫ്.സി മഞ്ചേരി  എന്നീ ടീമുകളാണു രംഗത്തുണ്ടാവുക.  എ ഡിവിഷനില്‍ ഏഴു ടീമുകളാണുള്ളത്.  കഴിഞ്ഞ രണ്ടു വര്‍ഷമായി മലപ്പുറം  എം.എസ്.പിയാണ് ജേതാക്കള്‍. എ.എസ്.സി അരീക്കോട്, എം.ഇ.എസ് കോളജ്  മമ്പാട്, ജൂവനൈല്‍ എടവണ്ണ, ഫ്രന്റ്‌സ് മമ്പാട്, നിലവിലെ റണ്ണേഴ്‌സായ  ബാസ്‌കോ ഒതുക്കുങ്ങല്‍, എവര്‍ഗ്രീന്‍ മഞ്ചേരി തുടങ്ങിയ ടീമുകളാണ്  എ ഡിവിഷനില്‍ രംഗത്തുള്ളത്. എ ഡിവിഷന്‍ ആദ്യ കളിയില്‍  എം.എസ്.പി മലപ്പുറവും  എഎസ്‌സി അരീക്കോടും ബി ഡിവിഷനില്‍ ബ്രദേഴ്‌സ് തിരൂരും റോയല്‍ എഫ്.സി മഞ്ചേരിയും തമ്മില്‍ ഏറ്റുമുട്ടും. 34 റഫറിമാരെ തെരഞ്ഞെടുത്തിട്ടുണ്ട്.
ജില്ലയിലെ മുന്‍നിര ടീമുകള്‍ ഏറ്റുമുട്ടുന്ന  എ, ബി ഡിവിഷന്‍ ടൂര്‍ണമെന്റുകള്‍ പയ്യനാട് സ്റ്റേഡിയത്തെ വീണ്ടും സജീവമാക്കും. പയ്യനാട് സ്‌പോര്‍ട്‌സ് കോംപ്ലക്‌സ് സ്റ്റേഡിയത്തില്‍ ഇതിനുള്ള ഒരുക്കങ്ങള്‍ നടന്നുവരികയാണ്.