തളിപ്പറമ്പ്: ബൈക്കുമായി  കൂട്ടിയിടിച്ചു നിയന്ത്രണം വിട്ട ബസ് മരപ്പണിശാലയിലേക്കു പാഞ്ഞുകയറി. ബൈക്ക് യാത്രികനു ഗുരുതരമായി പരുക്കേറ്റു. ഇന്നലെ രാവിലെ 8.45ഓടെ കറുമാത്തൂരിലെ പെട്രോള്‍ പമ്പിനു സമീപത്തായിരുന്നു അപകടം. തളിപ്പറമ്പില്‍ നിന്നു ചെമ്പേരിയിലേക്കു പോകുകയായിരുന്ന കെ.എല്‍.13 എക്‌സ് 3194 അലീന ബസ് എതിരേ വന്ന ബൈക്ക് യാത്രികനെ രക്ഷിക്കാനായി വെട്ടിച്ചപ്പോള്‍ മറ്റൊരു ബൈക്കില്‍ ഇടിക്കുകയായിരുന്നു. നിയന്ത്രണം വിട്ട ബസ് റോഡരികില്‍ പ്രവര്‍ത്തിക്കുന്ന വലിയവീട്ടില്‍ വുഡ് വര്‍ക്‌സ് എന്ന സ്ഥാപനത്തിലേക്ക് ഇടിച്ചു കയറുകയായിരുന്നു.
ബൈക്ക് യാത്രികന്‍  മണക്കാട്ടെ ജലീലിനെ പരിയാരം മെഡിക്കല്‍ കോളജാശുപത്രിയില്‍ പ്രവേശിപ്പിച്ചു. പത്തോളം ബസ് യാത്രക്കാര്‍ക്കും പരുക്കേറ്റു.