കോഴിക്കോട്: വരക്കല്‍ ബലിതര്‍പ്പണസമിതിയുടെ ആഭിമുഖ്യത്തില്‍ നടക്കുന്ന ബലിതര്‍പ്പണം തടസപ്പെടുത്താന്‍ സംഘടനയില്‍ നിന്ന് പുറത്താക്കിയ ചിലര്‍ ഹിന്ദു ഐക്യവേദിയുടെ സഹായത്തോടെ ശ്രമിക്കുന്നതായി സമിതി ചെയര്‍മാന്‍ ചന്ദ്രശേഖരന്‍ നായര്‍, കണ്‍വീനര്‍ കെ.പി ചന്ദ്രശേഖരന്‍, ട്രസ്റ്റ് അംഗം സുരേഷ്‌കുമാര്‍ എന്നിവര്‍ വാര്‍ത്താസമ്മേളനത്തില്‍ ആരോപിച്ചു.
അമാവാസി, നിത്യബലി കര്‍മങ്ങള്‍ക്ക് വരക്കലില്‍ സൗകര്യമുണ്ട്. 2010ല്‍ ക്ഷേത്രകമ്മിറ്റികള്‍ തമ്മില്‍ ബലിതര്‍പ്പണഭൂമിയിലെ സ്ഥാനങ്ങളെ ചൊല്ലി തര്‍ക്കങ്ങള്‍ ഉണ്ടായിരുന്നു. ഹൈക്കോടതി വിധിയുടെ അടിസ്ഥാനത്തില്‍ വരക്കല്‍ ബലിതര്‍പ്പണസമിതിക്കും വരക്കല്‍ ക്ഷേത്രകമ്മിറ്റിക്കും ശ്രീകണ്‌ഠേശ്വര ക്ഷേത്രം കമ്മിറ്റിക്കും പ്രത്യേകം സ്ഥലം അളന്നു തിരിച്ചു കൊടുത്തിരുന്നു. അതുപ്രകാരമാണ് ബലി തര്‍പ്പണം നടത്തിയിരുന്നത്. എന്നാല്‍ ബലിതര്‍പ്പണസമിതിയില്‍ നിന്നു രാജിവച്ചവരും ഹിന്ദു ഐക്യവേദിയുമായി ബന്ധമുള്ള ചിലരും സമിതിയുടെ പ്രവര്‍ത്തനത്തെ തടസപ്പെടുത്താന്‍ ശ്രമിക്കുകയാണ്. മുന്‍ ട്രസ്റ്റി വത്സകുമാര്‍, ഷാജി എന്നിവരാണ് ഇതിനു പിന്നിലെന്നും ഭാരവാഹികള്‍ ആരോപിച്ചു. 29, 30 തിയതികളിലാണ് തുലാമാസത്തിലെ വാവുബലി വരുന്നത്. ഇതിനായി വരക്കലില്‍ പന്തല്‍ കെട്ടിയപ്പോള്‍ ചിലര്‍  തടസം നിന്നു. പൊലിസിനും ജില്ലാ ഭരണകൂടത്തിനും പരാതി നല്‍കിയെങ്കിലും നടപടിയുണ്ടായിട്ടില്ലെന്നും ഭാരവാഹികള്‍ പറഞ്ഞു.