കോഴിക്കോട്: ഇന്ത്യന്‍ ഓയില്‍ കോര്‍പറേഷന്റെ ഫറോക്ക് ഡിപ്പോക്ക് കീഴിലെ ടാങ്കര്‍ ലോറി ഉടമകളുടെയും ജീവനക്കാരുടെയും സമരം ഒത്തുതീര്‍പ്പായതോടെ ഇന്ധന പ്രതിസന്ധിക്ക് വിരാമം. ഇന്ന് ഉച്ചയോടെ ഇന്ധന വിതരണം പൂര്‍വസ്ഥിതിയിലാകും. സമരം രണ്ടാം ദിവസത്തിലേക്ക് കടന്നതോടെ ഇന്നലെ ജില്ലയിലെ ഭൂരിഭാഗം പെട്രോള്‍ പമ്പുകളിലും സ്റ്റോക്ക് തീര്‍ന്നിരുന്നു. നഗരത്തിലെ ഐ.ഒ.സിയുടെ പമ്പുകളെല്ലാം തന്നെ കഴിഞ്ഞ ദിവസങ്ങളില്‍ അടച്ചിട്ടതോടെ മറ്റു കമ്പനികളുടെ പമ്പുകളെയാണ് ജനങ്ങള്‍ ആശ്രയിച്ചിരുന്നത്. എന്നാല്‍ ഇന്നലെ ഉച്ചയ്ക്ക് മുന്‍പു തന്നെ ഭൂരിഭാഗം പമ്പുകളും അടച്ചു.
ഇതോടെ വാഹനങ്ങളില്‍ ഇന്ധനമില്ലാതെ നൂറുകണക്കിനാളുകളാണ് പെരുവഴിയിലായത്. വൈകിട്ട് സമരം ഒത്തുതീര്‍പ്പായെന്ന വാര്‍ത്ത വന്നതോടെയാണ് ഇവര്‍ക്ക് ആശ്വാസമായി. ഇന്നലെ  തുറന്നു പ്രവര്‍ത്തിച്ച പമ്പുകളിലെല്ലാം രാവിലെ മുതല്‍ തന്നെ നീണ്ടനിരയായിരുന്നു. മറ്റു കമ്പനികളുടെ ലോറികളും സമരത്തില്‍ പങ്കെടുക്കാനുള്ള സാധ്യത മുന്‍കൂട്ടിക്കണ്ട് ഉച്ചയോടെ നിയന്ത്രിക്കാനാകാത്ത വിധത്തിലുള്ള തിരക്കാണ് പമ്പുകള്‍ക്ക് മുന്നില്‍ ദൃശ്യമായത്. പലയിടങ്ങളിലും വാഹനങ്ങളുടെ നിര പമ്പുകളില്‍ നിന്ന് റോഡിലേക്കിറങ്ങിയതോടെ ഗതാഗത തടസവും അനുഭവപ്പെട്ടു.