നുള്ളിപ്പാടി: ഐസി ഭണ്ഡാരി റോഡില്‍ പ്രവര്‍ത്തിക്കുന്ന ബീവറേജസ് കോര്‍പറേഷന്റെ ഔട്ട്‌ലെറ്റ് നുള്ളിപ്പാടി പെട്രോള്‍ പമ്പിനു സമീപം അണങ്കൂര്‍ റോഡിലേക്കു മാറ്റുന്നതിന്റെ ഭാഗമായി മദ്യവുമായെത്തിയ ലോറി നാട്ടുകാര്‍ തടഞ്ഞു.
ഇന്നലെ രാവിലെ ഒന്‍പതരയോടെ ലോറിയിലെത്തിയ മദ്യശേഖരം നാട്ടുകാരുടെ പ്രതിഷേധത്തെ തുടര്‍ന്ന് ലോഡിറക്കാതെ സമീപത്തേക്കു മാറ്റി നിര്‍ത്തി. 320ഓളം കുടുംബങ്ങള്‍ തിങ്ങിപ്പാര്‍ക്കുന്ന ഇവിടെ ബിവറേജ് ഔട്ട്‌ലെറ്റ് തുറക്കുന്നതില്‍ പ്രതിഷേധിച്ച് മദ്യവിരുദ്ധ സമിതിയുടെ നേതൃത്വത്തില്‍ നാട്ടുകാര്‍ കടയ്ക്കു മുന്‍പില്‍ സൂചനാ സമരവും സംഘടിപ്പിച്ചു.
ആക്ഷന്‍ കമ്മിറ്റി പ്രസിഡന്റ് എ സതീശന്‍, സെക്രട്ടറി എ ജയന്തകുമാര്‍, വനിതാ കൗണ്‍സലര്‍ ജാനവി സമരത്തിനു നേതൃത്വം നല്‍കി.
ഇതിനു മുന്‍പും ഇവിടെ ബീവറേജസ് ഔട്ട്‌ലെറ്റ് തുടങ്ങാന്‍ സര്‍ക്കാര്‍ തീരുമാനിച്ചിരുന്നെങ്കിലും നാട്ടുകാരുടെയും ജനപ്രതിനിധികളുടെയും രേഖാമൂലമുള്ള പരാതികള്‍ കാരണം വേണ്ടെന്നു വെക്കുകയായിരുന്നു.
സമരം ശക്തിപ്പെടുത്തുന്നതിന്റെ ഭാഗമായി ഇന്നുമുതല്‍ പ്രമുഖരെ പങ്കെടുപ്പിച്ചു കൊണ്ട് ധര്‍ണകള്‍ സംഘടിപ്പിക്കുമെന്ന് ആക്ഷന്‍ കൗണ്‍സില്‍ ഭാരവാഹികള്‍ അറിയിച്ചു.