നിലമ്പൂര്‍: സമസ്ത കേരള ജംഇയ്യത്തുല്‍ ഉലമാ താലൂക്ക് കമ്മിറ്റി നേരിട്ടു നടത്തുന്നതും പട്ടിക്കാട് ജാമിഅഃ നൂരിയ്യഃയുടെ ജൂനിയര്‍ കോളജുമായ ചന്തക്കുന്ന് മര്‍കസുല്‍ ഉലൂമില്‍ ഇസ്‌ലാമി (നിലമ്പൂര്‍ മര്‍കസ്)യില്‍ നിര്‍മാണം പൂര്‍ത്തിയാക്കിയ കാളമ്പാടി ഉസ്താദ് സ്മാരക സൗധത്തിന്റെ ഉദ്ഘാടനവും സമസ്ത ജനറല്‍ സെക്രട്ടറിയായിരുന്ന ചെറുശ്ശേരി സൈനുദ്ദീന്‍ മുസ്‌ലിയാര്‍ സ്മാരക സൗധത്തിന്റെ ശിലാസ്ഥാപനവും നാളെ വൈകീട്ട്  അഞ്ചിന് മര്‍കസ് പ്രസിഡന്റ് പാണക്കാട് സയ്യിദ് ഹൈദരലി ശിഹാബ് തങ്ങള്‍ നിര്‍വഹിക്കും.
സമസ്ത താലൂക്ക് പ്രസിഡന്റ് ഒ. കുട്ടി മുസ്‌ലിയാര്‍ അധ്യക്ഷനാകും. നാളെ വൈകീട്ട് നാലിന് മര്‍കസ് പ്രവര്‍ത്തകസമിതി, ജനറല്‍ബോഡി അംഗങ്ങള്‍, താലൂക്കിലെ  മഹല്ല് ഖാസി, ഖത്തീബുമാര്‍, പള്ളി മദ്‌റസ മാനേജ്‌മെന്റ് അംഗങ്ങള്‍, പ്രാസ്ഥാനിക പ്രവര്‍ത്തകരുടെ  സംഗമവും നടക്കും. മര്‍കസ് പ്രചാരണാര്‍ഥം 20, 21, 22 തിയതികളില്‍ അഹമ്മദ്  കബീര്‍ ബാഖവി ഉള്‍പ്പെടെയുള്ള പ്രമുഖ പണ്ഡിതരെ പങ്കെടുപ്പിച്ച് മര്‍കസ് ക്യാംപസ് ബീരാന്‍ ഔലിയ  നഗറില്‍ നടക്കുന്ന ത്രിദിന പ്രഭാഷണ പരിപാടിയുടെ വിജയത്തിനും സംഗമം അന്തിമരൂപം നല്‍കും.
130ല്‍പരം വിദ്യാര്‍ഥികള്‍ താമസിച്ച് പഠിക്കുന്ന സ്ഥാപനത്തില്‍ എട്ടുവര്‍ഷം കൊണ്ട് ഭൗതികമായി യൂനിവേഴ്‌സിറ്റി ഡിഗ്രി പൂര്‍ത്തീകരിച്ചും, മതപഠന രംഗത്ത്  പട്ടിക്കാട് ജാമിഅഃയിലെ പി.ജി കോഴ്‌സിന് തയാറാക്കുന്നതുമായ ശരിഅഃ കോളജ്, പ്രൈമറി മദ്‌റസ, സ്വയംതൊഴില്‍ പരിശീലനം, ദഅ്‌വാ സെന്റര്‍, സമസ്തയുടെയും കീഴ്ഘടകങ്ങളുടെയും താലൂക്ക്, മണ്ഡലം ആസ്ഥാനം എന്നിവയാണ് മര്‍കസ് കേന്ദ്രീകരിച്ച് ഇപ്പോള്‍ പ്രവര്‍ത്തിക്കുന്നത്. വാര്‍ത്താസമ്മേളനത്തില്‍ സ്വാഗതസംഘം ചെയര്‍മാന്‍ ഇ.കെ കുഞ്ഞമ്മദ് മുസ്‌ലിയാര്‍ കാട്ടുമുണ്ട, ജനറല്‍ കണ്‍വീനര്‍ പുത്തനഴി മൊയ്തീന്‍ ഫൈസി, കണ്‍വീനര്‍ സലീം എടക്കര, മര്‍കസ് മാനേജര്‍ ഹംസ ഫൈസി രാമംകുത്ത്, പ്രചാരണ സമിതി കണ്‍വീനര്‍ അടുക്കത്ത് ഇസ്ഹാക്ക് സംബന്ധിച്ചു.