വടകര: നഗരത്തിലെ കടത്തിണ്ണകളിലും ബസ് സ്റ്റാന്‍ഡുകളിലും റെയില്‍വേ സ്റ്റേഷനിലും അന്തിയുറങ്ങുന്നവര്‍ക്കു ഉച്ചഭക്ഷണവുമായി സ്‌കൂള്‍ വിദ്യാര്‍ഥികള്‍. പെരിങ്ങത്തൂര്‍ എന്‍.എ.എം ഹയര്‍ സെക്കന്‍ഡറി സ്‌കൂളിലെ സ്‌കൗട്ട് വിദ്യാര്‍ഥികളാണ് തെരുവില്‍ കഴിയുന്നവര്‍ക്കു ആശ്വാസം പകരാന്‍ എത്തിയിരിക്കുന്നത്.
ഒഴിവുദിവസങ്ങളില്‍ സ്‌കൂളില്‍ നിന്ന് ഭക്ഷണം പാകം ചെയ്ത് പായ്ക്കറ്റുകളിലാക്കി ടൗണില്‍ എത്തിക്കുന്ന സംവിധാനമാണ് ഒരുക്കിയിരിക്കുന്നത്. സ്‌കൗട്ട് വിദ്യാര്‍ഥികളായ തേജസ്, സബാഹ്, സായന്ത്, ഷിനോജ്, വിഷ്ണു, അഭയ്, അതുല്‍ കൃഷ്ണ തുടങ്ങിയവരുടെ നേതൃത്വത്തിലാണ് കഴിഞ്ഞ ദിവസം ഭക്ഷണവിതരണം നടത്തിയത്.
പുതിയ സ്റ്റാന്‍ഡില്‍ നടന്ന ചടങ്ങില്‍ നഗരസഭാ ചെയര്‍മാന്‍ കെ. ശ്രീധരന്‍ ഉദ്ഘാടനം ചെയ്തു. കെ.പി ശ്രീധരന്‍, റഫീഖ് കാരക്കണ്ടി, പി.സി നൗഷാദ് സംസാരിച്ചു.