ഫറോക്ക്: കഴിഞ്ഞ ദിവസം രാത്രി ഫറോക്കിലെ മത്സ്യമാര്‍ക്കറ്റിലും പാതയോരത്തും മറ്റുമുളള പച്ചക്കറി ഫ്രൂട്‌സ് കടകളിലും മോഷണശ്രമം. പണം ലക്ഷ്യം വച്ചു അഞ്ചിലധികം കടകളുടെ പണപ്പെട്ടിയും മറ്റും തകര്‍ത്തെങ്കിലും കാര്യമായൊന്നും മോഷ്ടാക്കള്‍ക്ക് ലഭിച്ചിട്ടില്ല.
    ഫറോക്ക് പഴയപാലത്തിനു സമീപം കരുവന്‍തിരുത്തി റോഡ് ജങ്ഷനില്‍  കച്ചവടം ചെയ്യുന്ന പാതിരിക്കാട് സ്വദേശി  ദില്‍ഷാദിന്റെ ഫ്രൂട്‌സ് കടയില്‍ നിന്നും 1200 രൂപ മോഷണം പോയി. ചില്ലറക്കായി കരുതി വച്ച പണമാണ് മോഷണം പോയത്. തൊട്ടടുത്തുളള ഫ്രൂട്‌സ് കടയുടെ പണപ്പെട്ടിയുടെ പൂട്ട് തകര്‍ത്തെങ്കിലും കാര്യമായൊന്നും കളവ് പോയിട്ടില്ല.
  കരുവന്‍തിരുത്തി റോഡിനു സമീപമുളള മത്സ്യമാര്‍ക്കറ്റിലാണ് മോഷണ ശ്രമം നടന്നത്. കരുവന്‍തിരുത്തി സ്വദേശി മുനീറിന്റെ പി.എം.എഫ് ഫിഷ് സ്റ്റാളിലെ ബോക്‌സിന്റെ പൂട്ട് തകര്‍ത്തു തുലാസും കത്തികളും പുറത്തേക്കും വാരിവലിച്ചിട്ട നിലയിലായിരുന്നു. ഇവിടെ നിന്നും പണമൊന്നും മോഷണം പോയിട്ടില്ല.
    ഫറോക്ക് ടൗണിലെ പച്ചക്കറി കടകളുടെ പൂട്ട് തകര്‍ത്ത നിലയിലാണ്. രാത്രി ഒരുമണിക്കും അഞ്ചു മണിക്കുമിടയിലാണ്  മോഷണ ശ്രമം. രാവിലെ  ഫ്രൂട്‌സ് കടക്കാരാണ് മോഷണം ശ്രമം നടന്നതായി കാണുന്നത്. ഫ്രൂട്‌സ് വെക്കുന്ന പെട്ടികളും മറ്റും കടയുടെ പുറത്തേക്ക് വലിച്ചിട്ട നിലയിലായിരുന്നു. ഫറോക്ക് എസ്.ഐ. വിജയരാജിന്റെ നേതൃത്വത്തില്‍ പൊലീസെത്തി കടകളില്‍ പരിശോധന നടത്തി. സമീപത്തെ സി.സി.ടി.വി ക്യാമറകളും പൊലീസ് പരിശോധിച്ചിട്ടുണ്ട്.