കൊച്ചി: എറണാകുളം സെന്റ് മേരീസ് ഓര്‍ത്തഡോക്‌സ് കത്തീഡ്രലിന്റെ നവതി ആഘോഷ സമാപന സമ്മേളനവും ശതാബ്ദി ഉദ്ഘാടനവും 29ന് നടക്കും. വൈകിട്ട് നാലിന് പക്കോമിയോസ് നഗറില്‍ (സെന്റ് മേരീസ് പള്ളിയങ്കണം) ബസേലിയോസ് മാര്‍ത്തോമ്മാ പൗലോസ് ദ്വിതീയന്‍ കാത്തോലിക്കാബാവ സമ്മേളനം ഉദ്ഘാടനം ചെയ്യും.
മെത്രാപ്പോലീത്ത യാക്കോബ് മാര്‍ ഐറേനിയോസ് അധ്യക്ഷത വഹിക്കും. കൊച്ചി മേയര്‍ സൗമിനിജെയിന്‍, പ്രൊഫ. കെ വി തോമസ് എംപി, ഹൈബി ഈഡന്‍ എംഎല്‍എ, കെഎംആര്‍എല്‍ എംഡി ഏലിയാസ് ജോര്‍ജ്ജ്, മുത്തൂറ്റ് എം ജോര്‍ജ്ജ് തുടങ്ങിയവര്‍ പങ്കെടുക്കും.
കൂടാതെ നവതിയോടനുബന്ധിച്ച് നിര്‍മ്മിച്ചു നല്‍കുന്ന രണ്ട് വീടുകളുടെ താക്കോല്‍ദാനവും വിദ്യാഭ്യാസ സഹായങ്ങളും ചടങ്ങില്‍ നല്‍കും. വാര്‍ത്താസമ്മേളനത്തില്‍ കത്തീഡ്രല്‍ വികാരി ഫാ. ജിജു വര്‍ഗീസ്, മുന്‍ വികാരി ഫാ. ഒ വി ഏലിയാസ്, ചെറിയാന്‍ തോമസ്, ഡാനിയേല്‍ ഉമ്മന്‍ എന്നിവര്‍ പങ്കെടുത്തു.