കടുത്തുരുത്തി: റോഡ് കൈയേറി നടത്തിയ കൃഷി പരാതിയെ തുടര്‍ന്ന് നീക്കം ചെയ്തു തുടങ്ങി. കടുത്തുരുത്തി പാണാവേലി കട്ടിങില്‍ നിന്നും സെന്റ് മൈക്കിള്‍സ് ഹയര്‍ സെക്കന്‍ഡറി സ്‌കൂളിലേക്കു പോകുന്ന റോഡിലാണ് സ്വകാര്യവ്യക്തി റോഡിന്റെ വശങ്ങള്‍ കൈയേറി കൃഷി ചെയ്തിരുന്നത്.
കപ്പയും വാഴയുമടക്കമുള്ളവയാണ് ഇവിടെ കൃഷി ചെയ്തിരുന്നത്. റോഡിന്റെ വശങ്ങളില്‍ കൃഷി ചെയ്തതിന് പുറമെ കാടും പള്ളയും മൂടുകയും ചെയ്തതോടെ റോഡിന്റെ വീതി കുറയുകയും രണ്ട് വലിയ വാഹനങ്ങള്‍ എതിര്‍ദിശയില്‍ നിന്നും ഒരേ സമയമെത്തിയാല്‍ ഗതാഗത തടസം ഉണ്ടാകുന്നതും പതിവായിരുന്നു.
ഇതേതുടര്‍ന്ന് നാട്ടുകാരും സ്‌കൂള്‍ അധികൃതരും റോഡരികിലെ അനധികൃത കൈയേറ്റങ്ങള്‍ ഒഴിപ്പിക്കണമെന്നും കാടും പള്ളയും നീക്കം ചെയ്യണമെന്നും ആവശ്യപെട്ട് പഞ്ചായത്തിനും പി.ഡബ്ല്യൂ.ഡിക്കും നിവേദനംനല്‍കിയിരുന്നു. ഇതേതുടര്‍ന്നാണ് ഇന്നലെ ജെ.സി.ബി എത്തിച്ചു റോഡരികിലെ അനധികൃത കൃഷിയും കാടും പള്ളയുമെല്ലാം നീക്കം ചെയ്തു തുടങ്ങിയത്.
ഈ ഭാഗത്ത് റോഡരിക് കാട് മൂടിയതോടെ മാലിന്യം ഉപേക്ഷിക്കുന്നതും പതിവായിരുന്നു. സ്‌കൂളിലേക്കുള്ള വഴിയില്‍ മാലിന്യങ്ങള്‍ ഉപേക്ഷിക്കുന്നത് ഏറേ ബുദ്ധിമുട്ടുകള്‍ ഉണ്ടാക്കിയിരുന്നു. കൂടാതെ രാത്രിയില്‍ ഇവിടം കേന്ദ്രീകരിച്ചു ചിലര്‍ സാമൂഹ്യവിരുദ്ധ പ്രവര്‍ത്തനങ്ങള്‍ നടത്തുന്നതായും ആക്ഷേപമുയര്‍ന്നിരുന്നു.