തിരുവനന്തപുരം: നഗരത്തില്‍ വനിതാ മാധ്യമപ്രവര്‍ത്തകരുടെ ചിത്രം പതിച്ച് അവര്‍ക്ക് അപകീര്‍ത്തികരമായ കാര്യങ്ങള്‍ എഴുതി ബോര്‍ഡുകള്‍ സ്ഥാപിച്ച സംഭവം ഗൗരവമായിക്കണ്ടു നടപടി സ്വീകരിക്കാന്‍ സര്‍ക്കാരിനും ഡി.ജി.പിക്കും നിര്‍ദേശം നല്‍കുമെന്ന് കേരള വനിതാകമ്മിഷന്‍ അധ്യക്ഷ കെ.സി. റോസക്കുട്ടി പറഞ്ഞു.
മാധ്യമപ്രവര്‍ത്തകര്‍ക്കെതിരെ ഒരുകൂട്ടം അഭിഭാഷകര്‍ നല്‍കിയ പരാതി വ്യാജമാണെന്നുകണ്ടാല്‍ അതു പിന്‍വലിക്കാന്‍ നടപടി സ്വീകരിക്കുമെന്നും അവര്‍ അറിയിച്ചു. തിരുവനന്തപുരം റസ്റ്റ് ഹൗസ് ഹാളില്‍ കമ്മിഷന്റെ മെഗാ അദാലത്തിനുശേഷം മാധ്യമങ്ങളോടു സംസാരിക്കുകയായിരുന്നു അവര്‍.
കമ്മിഷന്‍ സ്വമേധയാ കേസെടുക്കാന്‍ ആലോചിക്കുന്നതിനിടെയാണു പത്രപ്രവര്‍ത്തകരുടെ പരാതി ലഭിച്ചത്. തുടര്‍ന്നു സംഭവത്തെപ്പറ്റി കമ്മിഷന്‍ സര്‍ക്കാരുമായി ആശയവിനിമയം നടത്തി. നിയമപാലനത്തിന്റെ വിവരങ്ങള്‍ ജനങ്ങളിലേക്ക് എത്തിക്കാനുള്ള സംവിധാനത്തെ നീതിന്യായ സംവിധാനത്തിന്റെ ഭാഗമായവര്‍ തന്നെ എതിര്‍ക്കുന്നത് സര്‍ക്കാര്‍ ഗൗരവമായി കാണുന്നുവെന്നാണ് സര്‍ക്കാര്‍ അറിയിച്ചത്. സര്‍ക്കാര്‍ ഗൗരവമായി ഇടപെടുന്ന സാഹചര്യത്തില്‍ മറ്റു നടപടികളിലേക്കു കമ്മിഷന്‍ തല്‍ക്കാലം കടക്കുന്നില്ലെന്നും അവര്‍ പറഞ്ഞു.
അദാലത്തില്‍ പരിഗണിച്ച 103 പരാതികളില്‍ 38 എണ്ണം തീര്‍പ്പായി. പത്തെണ്ണം പൊലീസ് റിപ്പോര്‍ട്ടിന് അയച്ചു. അഞ്ചെണ്ണം കൗണ്‍സിലിങ്ങിനു വിട്ടു. ഒറ്റക്കക്ഷി മാത്രം ഹാജരായ 30 കേസുകള്‍ അടുത്ത അദാലത്തിലേക്കു മാറ്റി. പരിഗണിച്ചവയില്‍ 20 എണ്ണത്തില്‍ തീരുമാനമായില്ല. അവയും പിന്നീടു പരിഗണിക്കും. അദാലത്ത് ഇന്നും തുടരും.