മാള: അഷ്ടമിച്ചിറയില്‍ മത്സ്യ വില്‍പന നടത്തുന്ന യുവാവിനെ മത്സ്യ കച്ചവടക്കാരായ മൂന്നംഗ സംഘം മര്‍ദിച്ചതായി പരാതി. മാള കോട്ടുവള്ളി പരേതനായ യൂസഫിന്റെ മകന്‍ റിയാസ് (25)നാണ് മര്‍ദനമേറ്റത്. ഇയാളെ കൈക്ക് ഗുരുതരമായി പരുക്കേറ്റ നിലയില്‍ ചാലക്കുടിയിലെ സ്വകാര്യ ആശുപത്രിയില്‍ പ്രവേശിപ്പിച്ചു.
യുവാവിന്റെ പരാതിയില്‍ അഷ്ടമിച്ചിറ ഉരുണ്ടോളി സ്റ്റാന്‍ലില്‍ (28) പിതാവ് കൈവെട്ട് ജോസെന്ന ജോസ് (55) തൊഴിലാളി ജോയ് (40) എന്നിവരെ മാള പൊലിസ് കസ്റ്റഡിയില്‍ എടുത്തു. ഇന്നലെ പകല്‍ അഷ്ടമിച്ചിറയിലാണ് സംഭവം. ഇരുവരുടേയും സ്റ്റാളുകള്‍ അടുത്തുണ്ട്. മത്സ്യത്തിന്റെ വില ഉച്ചത്തില്‍ വിളിച്ചു പറയുന്നതില്‍ അമര്‍ഷം പൂണ്ടാണ് സംഘം ചേര്‍ന്ന് മര്‍ദനം നടത്തിയത്.
നേരത്തെ മാംസ വില്‍പന നടത്തിയ ജോസ് മത്സ്യ കച്ചവടത്തിലേക്ക് മാറിയിരുന്നു. വിപണിയില്‍ നേരത്തേ തന്നെ ഇവര്‍ തമ്മില്‍ സംഘര്‍ഷം നടന്നിരുന്നതായി സൂചനയുണ്ട്. സംഘം ചേര്‍ന്ന് മര്‍ദനം നടത്തിയതിന്  പ്രതികള്‍ക്കെതിരെമാള പൊലിസ് കേസെടുത്തു.