ചാവക്കാട്: പഞ്ചായത്ത് റോഡ് നിര്‍മിക്കാന്‍  കരുതി  വെച്ച പുറമ്പോക്കു സ്ഥലം സ്വകാര്യ വ്യക്തി കയ്യേറി മതില്‍ കെട്ടാനുള്ള ശ്രമം അധികൃതര്‍ തടഞ്ഞു. ആറടിയോളം  വീതിയില്‍ നൂറ്റമ്പതു മീറ്ററോളം  സ്ഥലമാണ് സ്വകാര്യ വ്യക്തി കയ്യേറി മതില്‍ നിര്‍മാണം നടത്താന്‍ തറ കീറി കല്ലിട്ടു തുടങ്ങിയത്. വിവരമറിഞ്ഞ നാട്ടുകാര്‍ പഞ്ചായത്തിനെ വിവരമറിയിക്കുകയും ഉദ്യോഗസ്ഥര്‍ സ്ഥലത്തെത്തി പണിനിര്‍ത്തിവെക്കാനുള്ള നോട്ടിസ് നല്‍കുകയും ചെയ്തു. ഒരുമനയൂര്‍ പഞ്ചായത്തില്‍ ആറാംവാര്‍ഡില്‍ ഇല്ലത്തു പള്ളിക്കു മുന്നിലൂടെയുള്ള  എ.കെ.ജി റോഡിന്റെ ഭാഗമാണ് കൈയേറ്റം നടത്തിയത്. റോഡില്‍ പകുതിയിലധികം ടാര്‍ ചെയ്തതാണ്. ബാക്കി 150 മീറ്റര്‍ സ്ഥലം പൊതുസ്ഥലമാണ്. ഈ സ്ഥലത്തു റോഡ് നിര്‍മിച്ചാല്‍ മുത്തമ്മാവിലെക്കുള്ള റോഡിനുള്ള സ്ഥലം പഞ്ചായത്തിന് നല്‍കാന്‍ മറ്റൊരു സ്വകാര്യ വ്യക്തി   തയ്യാറായിട്ടുണ്ട്. പഴയ വലിയ തോട് കാന ക്കെട്ടി ലക്ഷകണക്കിന് രൂപ ചെലവഴിച്ചാണ് പഞ്ചായത്തുറോഡിനായി സ്ഥലം നികത്തിയെടുത്തത്.  നികത്തിയെടുത്ത ഈ സ്ഥലമാണ് സ്വകാര്യ വ്യക്തി കൈയേറാന്‍ നോക്കിയത്. ടാര്‍ ചെയ്ത ഭാഗത്തിന്റെ സമീപത്തു വേണ്ടത്ര സ്ഥലം വിടാതെ തറക്കുള്ള ചാല് കീറി കല്ലുകളിട്ട നിലയിലുമാണ്. ഈ ഭാഗത്തെ നൂറുകണക്കിന് ജനങ്ങളുടെ ചിരകാല സ്വപ്നമാണ് ഈറോഡ്. ആവശ്യമായ പെര്‍മിറ്റ് വാങ്ങാതെയാണ് നിര്‍മാണം നടത്തുന്നതെന്ന് കണ്ടതിനാലാണ് പണി നിര്‍ത്താനുള്ള നോട്ടിസ് നല്‍കിയതെന്ന് പഞ്ചായത്ത് സെക്രട്ടറി ഇ.എ രാജന്‍ പറഞ്ഞു. പൊതുസ്ഥലം കയ്യേറിയെന്ന നാട്ടുകാരുടെ പരാതി വില്ലേജ് അധികൃതരുമായി ബന്ധപ്പെട്ടു പരിശോധിക്കുമെന്നും അദ്ദേഹം വ്യക്തമാക്കി. പഞ്ചായത്ത് ഓവര്‍സിയര്‍ സിനിയുടെ നേതൃത്വത്തിലാണ് ഉദ്യോഗസ്ഥര്‍ സ്ഥലത്തെത്തിയത്. വാര്‍ഡ് അംഗം സിന്ധു അശോകനും നാട്ടുകാരും സ്ഥലത്തെത്തിയിരുന്നു.