ഇസ്‌ലാമാബാദ്: കഴിഞ്ഞ ദിവസം പാകിസ്താനില്‍ അറസ്റ്റിലായ 'അഫ്ഗാന്‍ മൊണാലിസ' എന്നറിയപ്പെടുന്ന ഷര്‍ബത് ഗുല ബിബി എന്ന സ്ത്രീക്കുവേണ്ടി തന്നാലാകുന്ന നിയമസഹായങ്ങള്‍ നല്‍കുമെന്ന് നാഷണല്‍ ജിയോഗ്രാഫിക് മാസികയ്ക്കു വേണ്ടി അവരുടെ ചിത്രം പകര്‍ത്തിയ ഫോട്ടോഗ്രാഫര്‍. നാഷനല്‍ ജിയോഗ്രഫിക് ഫൊട്ടോഗ്രഫര്‍ സ്റ്റീവ് മക്കറിയാണ് ഇക്കാര്യം പറഞ്ഞത്.
1985ല്‍ മക്കറി പകര്‍ത്തിയ ഷര്‍ബത് ബിബിയുടെ ഫോട്ടോയാണ് നാഷണല്‍ ജിയോഗ്രാഫിക് മാസികയുടെ കവര്‍ചിത്രമായി പ്രസിദ്ധീകരിച്ചിരുന്നത്. അന്ന് അവര്‍ക്കു 12 വയസായിരുന്നു പ്രായം. തിളങ്ങുന്ന  കണ്ണുകളായിരുന്നു ഇവരുടെ ഫോട്ടോയെ ശ്രദ്ധേയമാക്കിയിരുന്നത്. വ്യാജ തിരിച്ചറിയല്‍ കാര്‍ഡുമായി ബന്ധപ്പെട്ടു കഴിഞ്ഞ ദിവസം പെഷവാറില്‍വച്ചാണ് പാകിസ്താനിലെ ഫെഡറല്‍ ഇന്‍വെസ്റ്റിഗേഷന്‍ ഏജന്‍സി (എഫ്.ഐ.എ) ഷര്‍ബത് ബിബിയെ അറസ്റ്റ് ചെയ്തത്.
14 വര്‍ഷംവരെ തടവ് ലഭിക്കാവുന്ന കുറ്റമാണ് ഇവര്‍ക്കുമേല്‍ ചുമത്തപ്പെട്ടിരിക്കുന്നത്. തുടര്‍ന്നാണ് അന്ന് ഇവരുടെ ചിത്രം പകര്‍ത്തിയ സ്റ്റീവ് മക്കറി സഹായവാഗ്ദാനവുമായി ഇന്‍സ്റ്റഗ്രാമില്‍ പ്രത്യക്ഷപ്പെട്ടത്.
പാകിസ്താനിലുള്ള സുഹൃത്തുക്കളെയും അധികൃതരെയും ബന്ധപ്പെട്ട് ഷര്‍ബത് ബിബിക്കാവശ്യമായ സഹായങ്ങള്‍ ചെയ്യുമെന്ന് അദ്ദേഹം എഴുതി. അവര്‍ക്കെതിരായ നടപടികളെ അദ്ദേഹം അപലപിക്കുകയും ചെയ്തു.