കളമശ്ശേരി:  ഏരിയാ സെക്രട്ടറിക്കെതിരേ വന്ന ആരോപണങ്ങള്‍ക്കെതിരേ സി.പി.എം വെള്ളിയാഴ്ച്ച നടത്താനിരുന്ന വിശദീകരണയോഗം മാറ്റിവെച്ചു. ഏരിയാ സെക്രട്ടറി തന്നെ മുന്‍കൈ എടുത്ത് പാര്‍ട്ടി അംഗങ്ങള്‍ക്ക് കത്ത് നല്‍കിയാണ് പരിപാടി സംഘടിപ്പിക്കാനിരുന്നത്. എന്നാല്‍ വ്യാഴാഴ്ച്ച സക്കീര്‍ ഹുസൈനെതിരേ പാലാരിവട്ടം സ്റ്റേഷനില്‍ കേസ് രജിസ്റ്റര്‍ ചെയ്തതോടെയാണ് പരിപാടി മാറ്റിവച്ചത്.
തനിക്കെതിരേ ഉയര്‍ന്ന കേസും അഴിമതി ആരോപണങ്ങളും കളമശ്ശേരിയിലെ ഒരു പ്രമുഖ വ്യവസായിയും യൂത്ത് കോണ്‍ഗ്രസ്സും കെട്ടിച്ചമച്ചതാണെന്ന് സി.പി.എം ഏരിയാ സെക്രട്ടറി സക്കീര്‍ ഹുസൈന്‍ പ്രസ്താവനയില്‍ പറഞ്ഞു.
ഒന്നര വര്‍ഷം മുന്‍പ് കങ്ങരപ്പടിയിലെ വനിത സംരഭക ഷീല തോമസിന്റെ സ്ഥാപനം ജൂബി പൗലോസ് അക്രമിച്ച സമയത്താണ് ഈ വിഷയത്തില്‍ ഇടപെടുന്നത്.
പ്രശിനപരിഹാരത്തിനായി ഇടപെട്ടെങ്കിലും നടന്നില്ല. ഈ സംഭവത്തില്‍ ഇരുവരും തമ്മിലുള്ള കേസ് കോടതിയിലാണ്. ഒന്നര വര്‍ഷം മുന്‍പ് ഉണ്ടായ സംഭവത്തില്‍ ഇപ്പോള്‍ നടത്തുന്ന കള്ളപ്രചാരവേലയെ നിയമപരമായി നേരിടുമെന്നും അദ്ദേഹം പറഞ്ഞു.