തൊടുപുഴ: തൊടുപുഴയില്‍ വോളിബോള്‍ തരംഗം വീണ്ടും. വോളിബോളിന്റെ നഷ്ടപ്രതാപം വീണ്ടെടുക്കുന്നതിന് കാരിക്കോട് കാസ്‌ക് സോഷ്യല്‍ സര്‍വ്വീസ് സൊസൈറ്റിയാണ് വോളിബോള്‍ മേള സംഘടിപ്പിച്ചിരിക്കുന്നത്.
നാലാമത് കാസ്‌കപ്പ് വോളി  ടൂര്‍ണമെന്റ് നവംബര്‍ 13 മുതല്‍ 20 വരെ കാരിക്കോട് കാസ്‌ക് ഫ്‌ളഡ് ലിറ്റ് സ്‌റ്റേഡിയത്തില്‍ നടക്കും. വിവിധ ടീമുകളിലായി പ്രമുഖ വോളിബോള്‍ താരങ്ങള്‍ പങ്കെടുക്കും. 25001 രൂപ ക്യാഷ് അവാര്‍ഡിനും കെ.എസ്.പി മെമ്മോറിയല്‍ റോളിങ് ട്രോഫിക്കും 20001 രൂപ ക്യാഷ് അവാര്‍ഡിനും സീമാസ് വെഡ്ഡിങ് കളക്ഷന്‍ ട്രോഫിക്കും വേണ്ടിയുള്ള മത്സരത്തിനുള്ള ഒരുക്കങ്ങള്‍ നടന്നു വരികയാണെന്ന് കണ്‍വീനര്‍ കെ.എ സിനാജ് അറിയിച്ചു. 13ന് വൈകുന്നേരം ആറിന് അഡ്വ. ജോയ്‌സ് ജോര്‍ജ് എം പി ടൂര്‍ണമെന്റ് ഉദ്ഘാടനം ചെയ്യും.
വോളിബോള്‍ മേളയുടെ സംഘാടക സമിതി ഓഫിസ് കാരിക്കോട് പ്രവര്‍ത്തനമാരംഭിച്ചു. ഒളിമ്പ്യന്‍ ഒ പി ജെയൂഷ  ഉദ്ഘാടനം ചെയ്തു. ഗ്രാമങ്ങളിലെ കായിക കൂട്ടായ്മകളാണ് കായിക താരങ്ങളെ വളര്‍ത്തിയെടുക്കുന്നതെന്ന് ജെയൂഷ പറഞ്ഞു. ഫുട്‌ബോള്‍ പരിശീലകന്‍ പി എ സലിംകുട്ടി, കാസ്‌ക് ഭാരവാഹികള്‍, ജനപ്രതിനിധികള്‍ തുടങ്ങിയവര്‍ ചടങ്ങില്‍ പങ്കെടുത്തു.